Deputetja e PDK-së, Blerta Deliu-Kodra pas dështimit të 45-të për konstituim të Kuvendit ka bërë thirrje për protestë ndaj LVV-së.
Kjo pasi sipas saj, LVV po mban peng Kuvendin dhe nuk po i intereson fare jeta e qytetarit në Kosovë.
“Sot nuk lejohen ta ushtrojnë mandatin e tyre përfaqësues, ky mandat nuk na është dhënë nga një parti politike, por na është dhënë nga qytetarët, ndaj të cilëve ndjejmë obligim dhe përgjegjësi qytetare. Sot nuk po flasim për ndonjë keqkuptim teknik, sot kemi të bëjmë me një bllokadë të qëllimshme dhe përpjekje të qartë për ta shtypur pluralizmin politik, për të uzurpuar shtetin përmes kontrollit total mbi institucionet e Kosovës, dhe kjo natyrisht që është një shkelje flagrante e rendit kushtetues, është një sulm i paparë mbi demokracinë dhe është një fyerje për qytetarët e zakonshëm të vendit. Fjala ime sot është një protestë, një protestë ndaj një partie e cila e ka marr peng këtë Kuvend, protestë ndaj pushteti që fare s’i intereson jeta e rëndë që përballen qytetarët e Kosovës, i intereson vetëm ruajtja e karriges”, tha Deliu-Kodra./teve1.info/
