Deputetja e PDK-së, Blerta Deliu-Kodra në deklarimin e saj në konferencën pas mbledhjes së kryesisë së Kuvendit, ka thënë se partitë opozitare do ta gjejnë formën t’i japin fund kësaj qeverisje.
Sipas saj, vendi shpejt do të shkojë drejt zgjedhjeve, ose me shpërbërje të Kuvendit ose mocion të mosbesimit.
Ajo ka thënë se kryeministri, Albin Kurti tashmë është i dorëzuar, sepse vet i ka hapur rrugë zgjedhjeve.
“Kryetari Krasniqi ka një vit e gjysmë që ka kërkuar që kjo qeveri të dorëhiqet, kryeministri tashmë është i dorëzuar. Do të kemi natyrisht ose shpërbërje të Kuvendit ose mocion të mosbesimit, këtë do ta vendosë lidershipi i PDK-së, por është mirë që më në fund edhe kryeministri e tha. Ne po shkojmë drejt zgjedhjeve të cilat do të mbahen së shpejti. PDK e ka thënë tash e sa kohë që vendi duhet të shkojë sa më parë në zgjedhje. Zhvillimi ekonomik është i mangët, aferat koprruptive janë prezente. Nuk ka asnjë projekt që kjo qeveri për këtë mandat mund të thotë se e ka përfunduar. Ka një dorëzim, kryeministri e tha edhe vet që do ti hap rrugë zgjedhjeve të reja. Jam e bindur që partitë opozitare do ta gjejnë formën t’i japin fund kësaj keqqeverisje”, u shpreh Deliu-Kodra.
Ndërkohë ajo ka dhënë detaje edhe për kërkesën e kësaj partie dhe dorëzimin e 40 nënshkrimeve për një seancë të jashtëzakonshme, ku do të trajtohen kontratat njëburimore të nënshkruara nga kjo qeveri.
Deliu-Kodra ka thënë se janë identifikuar 220 kontrata që kapin vlerën e 150 milionë eurove në 7 institucione.
„Me kërkesën e PDK-së këtë të enjte jemi marr vesh të kemi një seancë për themelimin e komisionit hetimor parlamentar për kontratat njëburimore. Janë 40 nënshkrime të deputetëve të mbledhura për të trajtuar këtë çështje. PDK ka kërkuar që këtë të enjte pikë e parë e rendit të ditës të jetë kjo çështje e cila konsideroj që do t’i hap rrugë, do të zbardh parregullsitë të cilat PDK i ka identifikuar.Për vitin 2022-2023 për shtatë institucione janë përdorur një sasi e madhe e kontratave burimore, në kundërshtim me kushtet ligjore. Në 6 ministri dhe në KEK janë nënshkruar 220 kontrata të cilat kapin vlerën mbi 150 milionë euro, pa përfshirë këtu edhe kontratat e tilla më 2021. Ministria e Infrastrukturës ka nënshkruar 32 kontrata, ministria e Kulturës 36 kontrata, ministria e Shëndetësisë 6 kontrata, ministria e Arsimit 30 kontrata, ministria e Punëve të Brendshme 20, ministria e Tregtisë ka nënshkruar 5 kontrata“, ka shtuar ajo. /teve1.info/
