Presidenca e Kosovës ka njoftuar se të martën gjatë vizitës në Washington D.C shefja e stafit të presidentes, Learta Hollaj, dhe këshilltarja për politikë të Jashtme, Rejhan Vuniqi, janë takuar me zëvendësndihmës sekretarin e shtetit, Alexander Kasanof.
Sipas njoftimit gjatë takimit me theks të veçantë është diskutuar Dialogu Strategjik Kosovë-SHBA i cili u arrit me iniciativë të Presidentes, fushat që do të mbulohen nga ky dialog strategjik si dhe pritshmëritë nga ky proces.
“Gjithashtu, duke qenë dita e parë e punës e administratës së re të udhëhequr nga Presidenti Trump, Presidenca konfirmoi përkushtimin e saj të plotë për thellimin e vazhdueshëm të marrëdhënieve dhe zgjerimin e bashkëpunimit, duke potencuar rëndësinë e ruajtjes dhe avancimit të sigurisë si dhe fuqizimit dhe afirmimit ndërkombëtar të Republikës së Kosovës”, thuhet në njoftim.
Po ashtu bëhet e ditur se nga ana e Kasanof është theksuar rëndësia e vazhdimit të procesit të dialogut Kosovë-Serbi, ndërsa nga Presidenca siç thuhet është ritheksuar nevoja që Dialogu të përqendrohet në njohjen reciproke./teve1.info./
