Një delegacion i Kuvendit të Kosovës, i kryesuar nga Driton Hyseni dhe nga Xhavit Haliti si anëtar, po merr pjesë në konferencën e rradhës të Asamblesë Parlamentare të NATO-s, në Varshavë të Polonisë.
Në njoftim thuhet, se në këtë konferencë, janë duke prezantuar udhëheqësit dhe deputetët nga Asambleja, ekspertët dhe njohësit e fushës së sigurisë si dhe eprorët e lartë të shtetit nikoqir polak.
“Së voni, Kosova ka krijuar Misionin e saj të parë diplomatik në Poloni. Delegacioni po realizon takime dhe bashkëbisedime me pjesëmarrësit e tjerë, duke përçuar orientimin e Kosovës për luftën dhe agresionin rus në Ukrainë si dhe për çështjet e tjera që preokupojnë aleancën”, theksohet në njoftim.
Po ashtu, bëhet e ditur se kryesuesi i delegacionit, Driton Hyseni, gjatë diskutimit ka paraqitur ndihmën që Kosova ka ofruar për Ukrainën duke qenë nga ditët e para të agresionit krah aleatëve në NATO.
Sipas njoftimit, delegacionet nga vendet anëtare dhe vendet partnere të NATO-s për dy ditë do të jenë të fokusuar në temat si: Parandalimi dhe mbrojtja e NATO-s, pas samitit të Uashingtonit, përforcimet në krahun lindor, mbështetja për Ukrainën deri në fitoren e saj, e ardhmja e sigurisë e Evropës, Bjellorusia dhe rajoni i detit Baltik, ballafaqimi me autokracitë si dhe forcimi i qëndrueshmërisë demokratike.
Ndërsa, të martën, delegacionet do të vizitojnë fabrikën e armatimeve Lucznik-Radom.
“Vlen të theksohet se kjo është ngjarja e parë në të cilën delegacioni i Kuvendit të Kosovës merr pjesë me statusin e anëtarit të asociuar. Delegacioni i Kuvendit të Kosovës po shoqërohet nga Ambasadori i Kosovës në Poloni, Drilon S. Gashi dhe këshilltari diplomatik në Varshavë, Visar Rrecaj”, thuhet në njoftimin e Kuvendit në Facebook.
