Zëdhënësi i Qeverisë së Kosovës, Perparim Kryeziu për teve1.info ka thënë se i kuptojnë shqetësimet dhe brengat e zëvendës Ndihmës Sekretarin për Çështje Evropiane dhe Euroaziatik edhe përfaqësuesit amerikan për Ballkanin Perëndimor, Gabriel Escobar dhe i ndajnë po ato me të, sepse siguria e paqja janë vlera dhe interes jetik e i përbashkët.
Kryeziu i ka bërë thirrje qytetarëve serb të Kosovës që t’i konvertojnë targat duke përfituar nga lirimi tatimor e doganor.
“Njëkohësisht, ne kemi për obligim sundimin e ligjit, kushtetutshmërinë, vendimet qeveritare. Njëra nuk bën ta përjashtojë tjetrën. Nuk është data 31 e as 30 tetor sot. Jemi në kuadër të fushatës për konvertimin e targave ilegale në ato legale RKS. Ju bëjmë thirrje përsëri qytetarëve serbë të Kosovës që t’i konvertojnë targat duke përfituar nga lirimi tatimor e doganor”, tha Kryeziu për teve1.info
Ndryshe, Emisari i Posaçëm i Shteteve të Bashkuara të Amerikës për Ballkanin Perëndimor, Gabriel Escobar, ka kërkuar nga Vjosa Osmani dhe kryeministri Albin Kurti, të shtyhet vendimi për targat. Ai ka deklaruar se është e rëndësishme që kur Amerika dhe Quinti të bëjnë rekomandime, njerëzit t’i dëgjojnë.
“Nuk është sekret që ne kemi kërkuar një periudhë më të gjatë të zbatimit, dhe kemi kërkuar edhe 10 muaj të tjerë. Do të doja ta shihja këtë që të ndodhte. Kjo nuk është vetëm kërkesë e jona por edhe e pesë vendeve të Quintit, dhe për shkak se ne jemi shtetet që e përkrahim më së shumti Kosovën. Besojmë se është e rëndësishme që kur ne bëjmë rekomandime, njerëzit t’i dëgjojnë ato, mirëpo për shtyrjen e këtij vendimi nuk morën zotim nga Osmani e Kurti. Prandaj, ende po e pres këtë. Dua të sigurohem që njerëzit që janë të përfshirë në negociata të dëgjojnë një përgjigje pozitive për këtë kërkesë ka thënë Escobar në Kanal10.
