Spitali i Pejës ka dalë me një komunikatë për media pas raportimit se një foshnje ka vdekur për shkak të neglizhencës së stafit mjekësor.
Në komunikatë thuhet se ka pasur asistim të pacientes sipas protokollit të mamive dhe mjekëve specialist, por që foshnja fatëkeqësisht ka lindur e vdekur.
Tutje thuhet se gjatë tërë kohës së qëndrimit e deri në momentin kur pacientja është dërguar në lindje nuk ka pasur ankesë nga ana e pacientes dhe mbikqyerja ka qenë e vazhdueshme. Por që sipas tyre, pasi mamia e ka dërguar pacienten në monitorim të rregullt me Ctg, nuk ka vërejtur tonet e bebes.
“Gjatë tërë kohës së qëndrimit e deri në momentin kur pacientja dërgohet në lindje nuk ka pasur ankesë nga ana e pacientes dhe mbikqyerja e pacientes ka qenë e vazhdueshme. Rreth orës 16:20 mamia e dërgon pacienten në monitorim të rregullt me Ctg mirëpo nuk vërehen tonet e bebes. Me kërkesën e familjarëve lindja kryhet me prerje cezariane ku vërehet se fryti i vdekur i gjinisë femërore ka pasur të mbëshjtellur kordonin umbimical rreth trupit dhe dorës, që mendohet se mund të jetë shkaktar i mundshëm i vdekjes së papritur”, thuhet në komunikatë.
Spitali i Përgjithshëm në Pejë ka shprehur ngushëllime për familjarët e foshnjes, teksa kanë thënë se personeli është duke bashkëpunuar plotësisht me organet hetuese që po merren me rastin në fjalë.
“Spitali i Përgjithshëm në Pejë kupton pikëllimin e familjarëve, dhe NE shprehim keqardhjen për familjarët dhe bashkëndjejmë së bashku me ta lidhur me këtë rast, por në anën tjetër sigurojmë ata dhe gjithë opinionin se nuk bëhet fjalë për asnjë neglizhencë dhe rasti nuk ka ndodhur për shkak të mos veprimeve apo veprimeve të Personelit tonë, veprime këto të cilat kanë qenë skajshmërisht të mëdha dhe të bazuara në protokollet lidhur me lindjet, por raste të tilla fatëkeqësisht nuk janë në dorën tonë që ti evitojmë. Spitali i Përgjithshëm në Pejë dhe Personeli ynë është duke bashkëpunuar plotësisht me organet hetuese që po merrën me këtë rast”, thuhet tutje./teve1.info./
https://teve1.info/lajmet/vdes-foshnja-gjate-lindjes-babai-dyshon-ne-neglizhence-te-mjekeve-ne-peje/
