Juristi, Valdet Hoxha po e quan të papranueshme deklaratën e ministres së Drejtësisë, Albulena Haxhiu lidhur me pretendimet që Serbia është e përfshirë në arratisjet e fundit të të burgosurve nga burgjet e Kosovës.
Hoxha e ka parë si të arsyeshëm, intervistimin e saj nga ana e Prokurorisë Speciale, ngase siç thotë ai supozimet vijnë nga një zyrtar i lartë.
“Prokuroria Speciale nuk do të duhej ndryshe të vepronte. Kemi një deklarim të një zyrtari të lartë Qeverisë, të një ministre, madje të Drejtësisë, që ngrit pretendime ose supozime që Serbia ka gisht në lirimin e disa të burgosurve. Është një deklaratë befasuese, mos të themi e papranueshme sepse qeveritarët tashmë përmbyllin një mandat dhe do të duhej ta dinin se nuk janë analistë, OJQ, opozitë”, është shprehur ai në emisionin “Info Nata në Tëvë 1.
Më tej Hoxha ka vlerësuar se sqarimi i Haxhiut në prokurori është mirë që është bërë për shkak të situatës së komplikuar jo vetëm kombëtare, por edhe gjeopolitike.
“Është mirë që është ftuar që të sqarohet sepse është një situatë, jo vetëm kombëtare e komplikuar por gjeopolitike gjithandej kur edhe ka deklarime të zyrtarëve, ish-zyrtarëve të shërbimit sekret serb…për këtë mjegull duke futur informata 99 për qind të rrejshme. Këto janë pjesë e skenarit të Serbisë për ta minuar progresin në Republikën e Kosovës”, ka shtuar ai.
