E deklaratat e kryeministrit Kurti për krijimin e një prokurorie të re në mandatin e ardhshëm, po shihen si një tendencë për kapjen e sistemit të drejtësisë.
“Me 9 shkurt, 500 mijë zemra ku rrahin porsi një, sjellim jo vetëm Kuvend të ri jo vetëm Qeveri të re, por edhe Prokurori të re”
Është deklaratë që e përmend në çdo tubim.
Kandidati për kryeministër nga Lëvizja Vetëvendosje, Albin Kurti në fushatë por edhe gjatë mandatit të tij qeverisës, vazhdimisht ka sulmuar sistemin prokurorial.
Ai thotë se me mandatin e tij të dytë, do të krijojnë një Prokurori të re siç thotë ai për të përndjekur kriminelët e oligarkët.
Por, sa është i realizueshëm ky premtim i Kurtit?
Gzim Shala nga Instituti i Kosovës për Drejtësi, vlerëson që deklarime të tilla janë tendencë për kapjen e këtij institucioni.
Sipas tij, roli i pushtetit ekzekutiv dhe legjislativ duhet të jetë në reformat që nuk janë bërë ende në sistemin prokurorial.
“Nëse dëshiron që ta ndryshojë tërësisht mënyrën e funksionimit të sistemit prokurorial të Kosovës duhet të ndryshohet Kushtetuta e Republikës së Kosovës, që përpos shumicës së dyfishtë në Kuvend kërkon edhe shumicën e partive që përfaqësojnë minoritetet në Kosovë. Për këtë arsye deklarime të tilla nuk shkojnë në një vend që sundon ligji dhe që e proklamon sundimin e ligjit dhe janë mesazhe jashtëzakonisht negative në raport me sundimin e ligjit në Kosovë”, tha Gzim Shala nga Instituti i Kosovës për Drejtësi.
Edhe Anton Ndrecaj nga Instituti Clard thotë se ky premtim ka vetëm elemente të fushatës elektorale.
“Një tendencë e tillë që ekzekutivi t’i zgjedhë ose dekretojë dhe emëroj gjyqtarët dhe prokurorët është absolutisht e papranueshme. Unë nuk dua të besoj që kryeministri e ka një tendencë të tillë sepse kjo vërtetë është jashtëzakonisht e dëmshme jo vetëm për zhvillimin e demokracisë por është e dëmshme edhe për sundimin e rendit dhe ligjit”, deklaroi Anton Ndrecaj nga Instituti Clard.
Përpos kryeministrit Kurti, sulme ndaj Prokurorisë dhe Gjykatave ka pasur edhe nga ministrja e Drejtësisë, Albulena Haxhiu.
