Deklaratat e vazhdueshme të krerëve të shtetit tonë se Serbia po përgatit sulme të reja ndaj Kosovës, po ndikojnë negativisht në aspektin ekonomik.
Kryetari i Odës Ekonomike të Kosovës, Lulzim Rafuna kërkon nga Qeveria e Kosovës dhe liderët e vendit të jenë më të kujdesshëm siç thotë ai me mesazhet që po përçojnë tek përfaqësuesit e jashtëm. Këto deklarata për pasigurinë dhe paralajmërimet për ndonjë sulm të ri, sipas tij po bëhen pengesë për thithjen e investimeve të huaja në vend.
Rafuna thotë se pavarësisht që temat me Serbinë janë të hapura, kjo çështje sipas tij nuk duhet të jetë pengesë që shteti të punojë më shumë për të sjellë investime të huaja në Kosovë dhe për të dëshmuar që vendi është shtet stabil dhe miqësor.
“Një ndër pengesat pse investimet e huaja nuk vijnë në Kosovë, janë mesazhet që po përçohen. Kërkesa jonë është që të jemi të kujdesshëm shumë me mesazhet. Ne duhet të përçojmë mesazhe që Kosova është një vend shumë stabil, një vend miqësor i të bërit biznes, një vend i hapur për të thith investime të huaja që siguron investime të huaja në Kosovë. Ndërsa, sa i përket pikave të hapura që kemi me Serbinë sa më shpejtë që i mbyllim, është më mirë për Kosovën dhe gjithë rajonin”, deklaron Rafuna për KP.
Sa i përket bashkëpunimit ekonomik me Tiranën, Rafuna thotë se propozimi i OEK-ut është që në kufirin Kosovë-Shqipëri të kalohet me një sistem unik të vlerës së shtuar dhe malli të mos i nënshtrohet procedurave doganore.
Rafuna rithekson se me liberalizimin e vizave ka rënë edhe qarkullimi i bizneseve.
“Mungesa e fuqisë punëtorë, mosfresikimi i politikave fiskale, masat administrative dhe jo administrative që i kemi, sidomos sfidat me vendet e rajonit që na rrethojnë”, thotë ai.
Megjithatë, ai thotë se pavarësisht liberalizimit, pritjet janë që të ketë një fluks të diasporës dhe në këtë drejtim të shtohet qarkullimi financiar te bizneset.
Duke folur për sfidat e bizneseve, Rafuna uron që të ndryshojë qasja e qeverisë karshi sektorit privat, dhe në çdo vendim që prek bizneset të kërkohet edhe opinioni i tyre.
