Kuvendi i Shqipërisë miratoi me 92 vota pro një deklaratë që mbështet pafajësinë e ish-krerëve të Ushtrisë Çlirimtare të Kosovës (UÇK), të cilët po gjykohen në Hagë.
Kryeparlamentarja e Kuvendit të Shqipërisë, Elisa Spiropali, theksoi se Ministria për Europën dhe Punët e Jashtme do të angazhohet maksimalisht për të implementuar këtë qëndrim në çdo forum ndërkombëtar, duke mbrojtur dinjitetin dhe respektin për të vërtetën historike.
“Sot, Kuvendi i Shqipërisë ka folur me një zë të fuqishëm për të vërtetën e luftës çlirimtare të Kosovës dhe dinjitetin e atyre që e udhëhoqën atë. Ky qëndrim vjen jo vetëm nga salla e Kuvendit, por nga kujtesa e një kombi që e di çfarë do të thotë të luftosh për liri. Lufta e UÇK-së nuk ishte një kapitull i errët, por një dritë që ndriçoi një periudhë të errët për gjithë kombin shqiptar. Ishte një luftë për mbijetesë, dinjitet dhe për të drejtën e një populli për të jetuar i lirë në tokën e tij. Kjo e vërtetë është pjesë e ndërgjegjes sonë kolektive dhe nuk mund të interpretohet politikisht”, tha Spiropali.
Në një moment të vështirë për udhëheqësit e asaj lufte dhe për familjet e tyre, Spiropali theksoi se Shqipëria qëndron pranë Kosovës me solidaritet të plotë dhe besimin se drejtësia duhet të jetë e paanshme dhe e drejtë, në përputhje me të vërtetën historike.
“Ministria për Europën dhe Punët e Jashtme do të ndërmarrë çdo hap diplomatik për të mbrojtur këtë të vërtetë, për të kundërshtuar çdo përpjekje për të barazuar viktimën me agresorin dhe për të siguruar që zëri i Shqipërisë dhe i Kosovës të dëgjohet në çdo tryezë ndërkombëtare. Liria e Kosovës është një kapitull i përbashkët i historisë sonë dhe dinjiteti i saj është dinjiteti i gjithë kombit shqiptar”, përfundoi ajo./teve1.info/
