Refuzimi i Serbisë për të mos zbatuar marrëveshjet e arritura me Kosovën, po konsiderohet një prej arsyjeve që mund ta shtyjnë këtë shtet të heq dorë nga rruga drejt integrimit në BE. Por njohësit e fushës janë skeptik nga këto deklarata, pasi kjo mund të jetë stretegji për konsum politik nga shteti serb.
Procesi i dialogut për normalizimin e marrëdhënieve Kosovë-Serbi ka stagnuar. Krahas kësaj, në pikëpyetje është vënë edhe gatishmëria për integrim e shtetit serb në Bashkimin Evropian.
Sipas presidentit të Serbisë, Aleksandar Vuçiq shkak për këtë është refuzimi i zbatimit të të gjitha pikave të marrëveshjeve, të arritura së fundmi me Kosovën.
E këtë situatë, politologu Fidan Ukaj sheh më shumë si kërcënim ndaj BE-së, sesa realitet që mund të ndodhë.
“Është më shumë një paralajmërim drejt BE-së, e jo që mund të ndodhë në të vërtetë. Mos të harrojmë fondet e BE-së që ndahen për Serbinë janë shumë të rëndësishëm, për të mos thënë jetike oër ekonominë e Serbisë, e po ashtu shumë kompani të fuqishme kanë hapur me mijëra vende të punës në Serbi. Ndalja e rrugës së Serbisë për anëtarësim në BE, sigurisht që do të ketë një kundërpërgjigjje duke i ndalur këto fonde”.
Ndërkaq, nëse Serbia tërhiqet nga rrugëtimi i saj drejt BE-së, njohësi i çështjeve politike Visar Xani thotë se i hap rrugë Kosovës.
Liderët e Bashkimit Europian dhe Ballkanit Perëndimor pasditen e së mërkurës janë takuar në Bruksel.
Në fokus të këtij takimi temë diskutimi ishin tensionet mes Kosovës dhe Serbisë dhe normalizimi i marrëdhënieve mes dy vendeve, si një nga çështjet kryesore që shqetëson të gjithë rajonin.
