Në Kremlin, gjatë takimit me presidentin rus, Vladimir Putin patriarku serb, Porfirije u rreshtua qartazi nga Rusia.
Me ta në tavolinë ishte edhe kreu i Kishës Ortodokse Ruse, Kirilli.
Besnikërinë dhe dashurinë ndaj botës serbe nuk hezitoj ta shpreh patriarku, ku gjatë bisedës përmendi edhe Kosovën.
“Qëndrimi ynë për Kosovën, Republikën Serbe dhe Malin e Zi, e konsideroj dhe e ndiej se varet edhe nga qëndrimi i Federatës Ruse në nivel global. Dëshira ime, dhe e shumicës në Kishën tonë, është që në të ardhmen, nëse ndodh një rigrupim i ri gjeopolitik, të jemi pranë atij rrethimi rus, në botën ruse”, tha Porfirije.
Këtë takim, njohësit e fushës së sigurisë në Kosovë e cilësojnë kryekëput si legjitimim të politikës propaganduese të Rusisë karshi Kosovës.
“Politika serbe mbështetet në vazhdimësi nga Kisha serbe. Për mua kjo nuk është risi, është një ngjarje një moment që shënon kulmin e përpjekjeve të Kishës serbe për të legjitimuar mbështetjen e Rusisë në rastin konkret të vet Putinit për aktivitetin propagandues për aktivitetin tjetër kundër interesave të Kosovës dhe interesave shqiptare në Kosovë dhe më gjerë”, shprehet Fatmir Çollaku, profesor i kriminalistikës.
Ndërkaq, Avni Islami profesor i shkencave të Sigurisë, thotë se patriarku ka lidhje të ngushta me presidentin e Serbisë, Aleksandër Vuçiq.
“Kisha një rol të rëndësishëm në shtetin e Serbisë por edhe të Rusisë. Pra, nuk kanë arritë të shkëputen. E pamë vizitën e Profirije , klerikut , kryepeshkopit serb me presidentin Vuciq. Fjalët e tij ishin kryekëput fjalë politike në mënyrë gjeopolitike përfshirë Kosovën. Kjo do të thotë që bashkëpunimi i Kishës serbe me shtetin e Vuciqit janë të njëjtat dhe kanë të njëjtat pikëpamje dhe platforma të përbashkëta” , thotë Islami.
Sipas tij, shërbimet sekrete serbe po i përdorin Kishat edhe për të siguruar informacione brenda Kosovës.
Reagim për këtë ka pas edhe nga ministrja në detyrë e Punëve të Jashtme, Donika Gërvalla.
Ajo tha se deklaratat e Porfirijes në Moskë cenojnë sovranitetin e Kosovës dhe nxisin përçarje në të gjithë rajonin.
“Kreu i Kishës Ortodokse Serbe, Porfirije, vetëm disa ditë pasi iu lejua vizita në Kosovë, u shfaq në Moskë përkrah Presidentit rus Putin, duke bërë deklarata që cenojnë sovranitetin e Kosovës dhe nxisin përçarje në gjithë rajonin. Këto qëndrime nuk janë të reja. Kisha Ortodokse Serbe ka qenë historikisht pjesë e ideologjive nacionaliste që ushqyen luftërat në Kroaci, Bosnje e Hercegovinë dhe Kosovë në vitet ’90. Për fat të keq, ajo trashëgimi vazhdon edhe sot, përmes deklaratave që ofendojnë fqinjët, mohojnë realitetin dhe përpiqen të destabilizojnë Ballkanin”, ka thënë Gërvalla në reagimin e saj në Facebook.
Kreu i Kishës Ortodokse Serbe po qëndron në Rusi për një vizitë disa ditore.
