Në takimin 2 majit në kryeqendrën evropiane, pala kosovare dhe ajo serbe nuk u dakorduan në lidhje me zbatimin e marrëveshjes mbi planin evropian.
E si pasojë, e njëjta po konsiderohet se nuk është në rrugën e duhur.
Megjithatë, i dërguari i posaçëm i Shteteve të Bashkuara të Amerikës për Ballkanin Perëndimor, Gabriel Escobar vlerëson se marrëveshja në procesin e dialogut paraqet një hap historik përpara.
Derisa të dielën ai potencoi se nuk sheh arsye pse marrëveshja të mos zbatohet deri në fund të verës.
“Në Serbi ka disa elemente që duhet të plotësohen sa i përket njohjes së targave të veturave, letërnjoftimeve dhe disa gjërave të tjera. Edhe nga Kosova pritet të formojë Asociacionin e komunave me shumicë serbe. Më falni, kjo nuk është pritje. Është obligim”, tha Escobar.
Sipas njohësve të fushës kjo deklaratë po cilësohet si një lloj presioni për t’u arritur deri tek marrëveshja finale.
Ish diplomati, Blerim Canaj thotë se në rast se e njëjta nuk zbatohet mund të shfaq edhe rrezik.
Në anën tjetër, edhe njohësi i çëshjteve politike Seb Bytyçi vlerëson se afati i përcaktuar është ambicioz, meqë ka pengesa në implementimin e marrëveshjes.
Me 15 maj në Bruksel për ecurinë e porcesit të dialogut Kosovë – Serbi, u takuan dy kryenegociatorët Bislimi e Petkoviq, por takimi përfundoi pa rezultat.
