Zëvendëskryeministri i Kosovës, Besnik Bislimi, orë më parë u raportua se ka deklaruar që Kosova duhet të jetë gati për luftë, derisa përmendi sulmin terrorist në Banjskë.
Artikulli i publikuar në mediumin ukrainas “European Pravda”, me citatin se Bislimi ka thënë “Ne duhet të jemi gati për luftë”, është ndryshuar duke e zëvendësuar termin “luftë” me “konflikt i mundshëm”.
Artikulli në këtë medium u publikua para dy ditësh, por tek pasi u raportua edhe nëpër mediat kosovare ai pësoi ndryshime. Është pikërisht deklarata e Bislimit, arsyeja që mediumi ukrainas intervenoi në tekstin e botuar më 26 prill.
“Nëse i shikoni zhvillimet në anën e Serbisë, gjithmonë mund të llogarisni me një konflikt të mundshëm dhe ka disa elementë që tregojnë se kjo mund të jetë e mundur. Kjo do të thotë se ne jemi gjithmonë vigjilentë, gjithmonë llogarisim me skenarin më të keq të mundshëm. , por ne besojmë se prania e KFOR-it, trupave tona të NATO-s në Kosovë mund t’i pengojë këto tensione nga Serbia në një të ardhme të afërt, por është gjithmonë e mundur”, thotë Bislimi.
Bislimi i referohet ngjarjeve që ndodhën në Banjskë në shtator të vitit të kaluar, ku si pasojë e sulmit mbet i vrarë rreshteri Afrim Bunjaku.
