Kryesuesi i seancës konstituive, deputeti Avni Dehari tha se nuk pret diçka të re në seancën e sotme, e cila është përpjekje e 22-të për konstituim të kuvendit. Ai u shpreh se rregullorja e lejon edhe votimin e hapur edhe të fshehur, por siç shtoi Dehari, janë në pyetje inatet e partive politike.
Kryesuesi i seancës konstituive, deputeti Avni Dehari tha se nuk pret diçka të re në seancën e sotme, e cila është përpjekje e 22-të për konstituim të kuvendit. Ai u shpreh se rregullorja e lejon edhe votimin e hapur edhe të fshehur, por siç shtoi Dehari, janë në pyetje inatet e partive politike.
Para vazhdimit të seancës, e paraparë të fillojë në orën 11:00, Dehari tha se zgjidhja varet nga krerët e partive politike.
“Unë për sot nuk pres diçka të re, edhe pse do të dëshiroja të kishte të re sepse u bë shumë gjatë. Mirëpo, kjo nuk varet prej meje, varet prej krerëve të partive politike. Unë aty jam vetëm drejtues teknik, shpesh herë ka edhe keqkuptime, njerëzit thonë ‘pse nuk po i jep zgjidhje kësaj pune’, unë nuk jam as për t’i dhënë zgjidhje as për të mos i dhënë zgjidhje. As ta imponojë mënyrën e votimit, as si të votojnë as si mos të votojnë. Mirëpo, tash më ka ra hise për shkak të moshës, jo për shkak të ndonjë privilegji tjetër”, deklaroi ai.
Ai para mediave komentoi edhe deklarimet e partive të tjera, ku është thënë se Deharit po i përshtatet skenarëve të Albin Kurtit.
“Unë e kam dëgjuar dhe e kam parë edhe në media por nuk dua të merrem me ta. Thonë Avni Dehari e ka një skenar të sekretarisë edhe një skenar të Albin Kurtit. Skenari vazhdimisht na vjen prej sekretarisë, më vjen mua, i vjen Sala Jasharit edhe sekretaria e ka. Edhe unë atë skenar e kam, por skenari do të ndryshojë kur krerët e partive politike të merren vesh, atëherë sjellin një skenar edhe unë do të isha shumë i lumtur që ai skenar të jap fund edhe sot këtij ngërçi… Gjashtë herë është provuar me votim të hapur, nuk ka dhënë rezultat. Më 16 prill ju drejtova me një letër presidentes që të na ndihmojë, dhe në përgjigjen e saj thotë ‘me gjet zgjidhje’. Rregullorja e lejon edhe votimin e hapur edhe të fshehur, gjersa votimi i hapur nuk dha rezultat, vendosa ta provojmë edhe me votim të fshehur, prapë sërish nuk jep rezultat, sepse unë mendoj fatkeqësisht janë në pyetje inatet”, u shpreh Dehari.
Derisa foli për seancat e dështuara tre-minutëshe, ai tha se “nuk ka çfarë të bëjë”.
“Seanca për tre minuta do të përfundojë edhe po të ketë zgjidhje, sepse pika e tretë është vetëm votohet asgjë më tepër jo. Nuk është në rregull, nuk është mirë por s’ke çfarë i bën”, përfundoi ai.
Deputetët edhe sot do të mbledhin për një tentim të radhës për konstituim të Kuvendit të Kosovës. Kjo është përpjekja e 22-të me radhë që prej 15 prillit kur ka filluar seanca konstituive.
