Janë dëgjuar disa audio incizime në seancën e ish kryeshefit të KPM-së, Luan Latifi, i akuzuar për korrupsion.
Në këto audio të prokurorisë, janë dëgjuar bisedat e disa takimeve mes Latifit, pronarit të kompanisë Telkos, Elhami Haziri dhe ish drejtorit të Administratës dhe Financave në KPM, Arben Bilalli.
Përgjatë komentimit të bisedave të prokurorisë, avokati i Latifit e Hazirit, korrigjuan citimin e prokurores së rastit, Merrushe Llugiqi.
Madje kritika për keqcitim të bisedave pati mbrojtja e Latifit.
Edhe trupi gjykues kërkoi nga prokurorja që të ndante pjesët inkriminuese të audiove që të dëgjohen në gjykatore, por që me këtë nuk u pajtua prokurorja.
Ajo insistoi qe të dëgjohen të plota bisedat e përgjuara, pasi që ndërlidhen fjalët e thëna mes vete.
Seanca e radhës u caktua të mbahet në muajin korrik.
Aktakuza e ngritur më 15 shtator 2021, ngarkon Luan Latifin se në cilësinë e kryeshefit të Komisionit të Pavarur për Media (KPM) dhe Arben Bilalli, në cilësinë e drejtorit të Administratës dhe Financave në KPM, gjatë qershorit 2021, kishin kërkuar dhe marrë ryshfet shumën prej 8 mijë euro nga i dëmtuari Elhami Haziri, pronar i kompanisë “Telkos”.
Në aktakuzë thuhet se ky ryshfet ishte pranuar nga ana e të akuzuarve me qëllim që kompanisë “Telkos”, të mos i shqiptohet gjobë për shkak se e njëjta kishte bërë shkelje ligjore duke bërë shtrirje të rrjetit në disa vende për të cilat nuk e kishte njoftuar KPM-në.
Në seancën e mbajtur më datë 25 korrik 2022, Bilalli kishte pranuar fajësinë, dhe ishte veçuar procedura ndaj tij, ndërsa Latifi ishte deklaruar i pafajshëm.
Raport i gazetares Florijeta Dernjani