Gjergj Dedaj, ish-ambasador i Kosovës në Maqedoninë e Veriut, si dëshmitar në Gjykatën Speciale tha se presidentja Vjosa Osmani e shkarkoi atë dhunshëm nga kjo pozitë.
Dedaj është paraqitur si dëshmitar për ish-krerët e UÇK-së dhe akuzat e tij të mëparshme ndaj tyre.
Gjatë dëshmisë së tij, Dedaj sot, përmendi presidenten Osmani, të cilës iu referua si “e ashtuquajtura”.
“Së fundi kam qenë ambasador por jam larguar dhunshëm, brutalisht, dhe politikisht nga ana e ashtuquajturës presidente Osmani për qëllime politike sepse në vend timin e ka dërgu burrin e saj”, tha Dedaj.
Për këtë deklaratë ka reaguar këshilltari i presidentes Vjosa Osmani, Bekim Kupina.
Kupina thotë se Dedaj ka zgjedhur Gjykatën Speciale për të përhapur gënjeshtra lidhur me Osmanin.
“Presidentja Osmani nuk është “e ashtuquajtur”, siç e cilëson Serbia dhe ti Gjergj, por ka më së shumti legjitimitet në historinë e Kosovës. Ti e di këtë, por s’të pëlqen ky fakt. Prandaj sot e bëre atë që di më së miri: gënjeve”, ka shkruar Kupina në Facebook.
Tutje, ai tha se Osmani nuk e ka larguar Dedajt nga pozita për ta emëruar bashkëshortin e saj, por e kanë larguar shkeljet e tij.
“Së pari, Presidentja Osmani nuk të ka hequr ty për ta emëruar bashkëshortin e saj. Të hoqën shkeljet e tua. Së dyti, bashkëshorti i saj as nuk ka qenë e as nuk është ambasador, ndaj ti jo që s’e di, por ama të pëlqen gënjeshtra si mjet viktimizimi. Ti je veç një përfitues nga gënjeshtra! Ne ende jemi në pritje të drejtësisë për kërcënimet me jetë që i ke bërë publikisht ndaj Presidentes dhe familjes së saj”, shkroi ai tutje./teve1.info/
