Edon Zhegrova dhe Jonathan David, dyshja që mahniti me paraqitjet e tyre te Lille në Ligue 1 dhe në arenën evropiane, janë gati të shkruajnë një kapitull të ri dhe emocionues në karrierën e tyre, e këtë herë me fanellën e Juventusit.
Gjatë kohës së tyre në Francë, ata u bënë një kërcënim konstant për mbrojtjet kundërshtare.
Këtë verë, të dy u transferuan te “Zonja e Vjetër”, në një lëvizje që ka ngjallur entuziazëm të madh te tifozët bardhezinj.
Në një intervistë për mediat italiane, sulmuesi kanadez Jonathan David u shpreh me fjalë tepër pozitive për bashkëlojtarin e tij kosovar.
Ai vlerësoi jo vetëm cilësitë teknike të Zhegrovës, por edhe marrëdhënien e fortë mes tyre jashtë fushe.
“Unë i ndava disa sezone me të. Edoni është një lojtar i jashtëzakonshëm, e ka një të majtë të jashtëzakonshme dhe një driblim të shkëlqyer. Ai është një përforcim i madh. Në Lille e kishim gjithmonë një raport mjaft të mirë, brenda dhe jashtë fushës. Ka një lidhshmëri të madhe mes nesh dhe kjo do të jetë po ashtu një avantazh në Juventus,” tha David, duke lënë të kuptohet se kjo dyshe mund të shpërthejë edhe në Serie A.
Debutimi i tyre me fanellën e Juventusit pritet të ndodhë në një nga ndeshjet më të mëdha të kampionatit italian – Derbi i Italisë ndaj Interit.
Për Edon Zhegrovën, ky është një hap madhor në karrierë, që kaloi nga Ligue 1 në një nga ligat më të forta dhe me më shumë presion në botë.
