Për zhvillimet e fundit në veri të vendit të hënën u diskutua edhe në Departamentin e Shtetit të ShBA-së.
Zëvendës-zëdhënësi kryesor, Vedant Patel tha se ShBA i bën thirrje të dy palëve që të ndërmarrin veprime të menjëhershmë për t’i depërshkallëzuar tensionet.
Patel tha se Serbia duhet të ulë nivelin e sigurisë së forcave të tyre të armatosura dhe t’i nxisin serbët e Kosovës që të përmbahen nga dhuna.
“Ne do të vazhdojmë të mbetemi thellësisht të angazhuar drejtpërdrejt me të dyja qeveritë dhe SHBA-të dënojnë dhunën e papranueshme kundër trupave të KFOR-it të udhëhequr nga NATO-ja, forcave të rendit dhe gazetarëve. Dhe ne u bëjmë thirrje të gjitha palëve që të ndërmarrin veprime të menjëhershme për të ulur tensionet. Presidenti Vuçiq dhe qeveria e Serbisë duhet të ulin nivelin e sigurisë së forcave të tyre të armatosura dhe t’i nxisin serbët e Kosovës që t’i ndalin kundërshtimet ndaj KFOR-it dhe të përmbahen nga dhuna e mëtejme”, tha Patel në një konferencë për shtyp.
Ndërsa për Qeverinë e Kosovës ai tha se duhet të sigurojë që kryetarët e zgjedhur të kryejnë detyrat e tyre nga lokacionet alternative dhe t’i tërheqin forcat e policisë nga objektet komunale.
“Vendimi i Qeverisë së Kosovës për të detyruar hyrjen në ndërtesat komunale përshkallëzoi tensionet ashpërsisht dhe në mënyrë të panevojshme dhe kryeministri Kurti dhe qeveria e tij duhet të sigurojnë që kryetarët e zgjedhur të komunave të kryejnë detyrat e tyre tranzitore nga lokacione alternative dhe të tërheqin forcat policore që janë aty afër. Zëvendëskëshilltari i Sigurisë Kombëtare Jon Finer ka folur me kryeministrin Kurti dhe presidentin Vuçiq. Këshilltari Chollet foli me Vuçiqin dhe Escobar ndodhet në Prishtinë dhe Beograd dhe ne do të vazhdojmë të mbetemi thellësisht të angazhuar për këtë”, tha tutje ai, përcjell teve1.info.