Kombëtarja e Kosovës në futboll ka vazhduar me stërvitjet para duelit me Rumaninë, të cilin e luan në Bukuresht në kuadër të Ligës së Kombeve.
Pas stërvitjes së parë, të mbajtur të hënën mbrëma në stadiumin “Fadil Vokrri” në Prishtinë, “Dardanët” të martën paradite kanë mbajtur seancën e dytë stërvitore në kampin nacional të FFK-së në Hajvali.
Këtë herë, Foda pati në dispozicion më shumë futbollistë, ndonëse munguan kapiteni Amir Rrahmani dhe Mërgim Vojvoda.
Rrahmani ishte lënë në rigjenerim kurse Vojvoda nuk ka stërvitur për shkak të një shqetësimi, ndërsa Leart Sadriu ka vazhduar me stërvitje të diferencuar nga pjesa tjetër e grupit.
Në seancën e së martës, selektori Foda është fokusuar në aspektin taknik, duke përshtatur strategjitë për duelin ndaj Rumanisë dhe duke i kushtuar vëmendje detajeve që mund ta bëjnë diferencën në fushë.
Pas përfundimit të stërvitjes, Ilir Krasniqi dhe Zymer Bytyqi kanë ndarë optimizmin e tyre për duelin ndaj Rumanisë.
Ndeshja ndërmjet Rumanisë dhe Kosovës luhet të premten mbrëma dhe është e rëndësishme për pozitën e parë në grup.
Krasniqi insistoi se grupi është maksimalisht i motivuar për ta dhënë maksimumin në Bukuresht:
Ndërkohë, Bytyqi shtoi se atmosfera brenda ekipit është shumë e mirë dhe të gjithë lojtarët janë të fokusuar për një rezultat pozitiv ndaj Rumanisë.
Stërvitjen e radhës, “Dardanët” do ta mbajnë të mërkurën prej orës 11:00 në kampion nacional në Hajvali.
