Kombëtarja e Kosovës në futboll, të martën ka mbajtur stërvitjen e radhës në kuadër të përgatitjeve për ndeshjen me Lituaninë që e luan të shtunën në Ligën e Kombeve.
Të martën, në kampin nacional të FFK-së, në Hajvali, Kosova ka mbajtur stërvitjen e dytë nën urdhrat e selektorit Franco Foda.
Për dallim prej të hënës kur Kosova e nisi grumbullimin dhe Foda kishte në dispozicion vetëm 12-të futbollistë, të martën kontigjentit i janë shtuar edhe nëntë lojtarë tjerë.
Kështu që, stërvitjen e dytë të “Dardanëve”, selektori Foda e ka mbajtur me 21 lojtarë dhe ka punuar me intensitet të plotë për ta përgatitur sa më mirë ekipin gjatë ditëve që i ka në dispozicion para ndeshjes së parë të këtij muaji.
Në stërvitjen e dytë, munguan portieri Arijanet Muriq, mbrojtësi i krahut, Leart Paqarada dhe sulmuesi Milot Rashica.
“Dardanët” do të vazhdojnë me stërvitje deri të premten kur edhe pritet të marrin rrugët drejt Kaunasit për ta zhvilluar ndeshjen me Lituaninë.
Tri ditë pas ndeshjes me Lituaninë, Kosova e pret Qipron në stadiumin “Fadil Vokrri” në Prishtinë.
Kosova muajin e shkuar e filloi kampanjën e re në Ligën e Kombeve, ku në dy ndeshje regjistroi një humbje dhe një fitore.
U mposht 3:0 nga Rumania në Prishtinë, përpara se të triumfoj 4:0 ndaj Qipros në Larnaca.
