Pas disfatës nga Ukraina, futbollistet e Kombëtares së Kosovës do të përballen me Uellsin në kuadër të kualifikimeve për “Euro 2025”.
Të premten e shkuar, Kosova pësoi 2:0 në Antalia të Turqisë nga Ukraina, ndërsa të martën do të kenë punë me Uellsin. Dueli mes Kosovës dhe Uellsit, zhvillohet në stadiumin “Zahir Pajaziti” në Podujevë dhe nis në orën 14:00. Uellsi është favorit i Grupit 4 të Ligës B, pasi në ndeshjen e parë triumfoi 4:0 ndaj Kroacisë.
Te Kosova e kanë parasysh se ndeshja me Uellsin do të jetë sfiduese, por insistojnë se do të japin më të mirën dhe nuk do të dorëzohen për asnjë moment.
“Dardanet” të hënën e kanë mbajtur stërvitjen e fundit para ndeshjes me Uellsin. Stërvitja u mbajt në kampin nacional të FFK-së në Hajvali, ndërsa te Kosova kishte optimizëm.
Selektorja Anneli Andersen ka pranuar se i pret një ndeshje e vështirë por ka thënë se ekipi është përgatitur mirë dhe i gatshëm për lojë. Futbollistja Lumbardha Misini ka zbuluar se gjatë këtyre ditëve kanë punuar për t’i evituar gabimet e bëra me Ukrainën dhe se ndaj Uellsit futen për rezultat pozitiv. Krahas Misinit, optimizmin e saj për ndeshjen me Uellsin e ka shprehur edhe futbollistja tjetër, Valentina Metja që ka insistuar se janë përgatitur maksimalisht për të neutralizuar lojën e kundërshtareve.
Te Kosova llogarisin edhe në përkrahje të shikuesve në tentim për ta ndalur favoritin e grupit. Kosova ndeshjet e radhës i ka në qershor. Në grupin kualifikues i duhet të renditet në njërën prej tri pozitave të para për të vazhduar në plejof. Nëse mbetet e fundit kthehet në Ligën C.
Para ndeshjes me Ukrainën, Kosova ishte në seri prej 14 ndeshjeve pa humbje. Kishte 13 fitore në këtë seri impresive, gjatë së cilës nga Liga C kaloi në Ligën B të Ligës së Kombeve.