Basketbollistet e Kosovës kanë mësuar kundërshtarët për Kampionatin Evropian të shteteve të vogla, i cili këtë vit për herë të parë do të mbahet në Kosovë.
Në shortin e tërhequr të martën në Munih të Gjermanisë, është përcaktuar që Kosova të jetë pjesë e Grupit A. Në këtë grup, bëjnë pjesë edhe Qipro dhe Malta.
Ndërkohë, pjesë e Grupit B, janë Norvegjia, Shqipëria, Andorra dhe Armenia. Ky kampionat i FIBA-s, do të mbahet në Prishtinë nga data 25 deri më 30 qershor të këtij viti.
Për basketbollistet e Kosovës, kjo do të jetë hera e tretë që do të paraqiten në Kampionatin Evropian për Shtete të vogla. Kosova debutoi në vitin 2021 në këtë kampionat, ku doli e treta kurse në vitin 2022, përfundoi e pesta.
