Peja e ka barazuar serinë e Play-Offit ndaj Bashkimit, duke e mposhtur ekipin prizrenas në duelin e dytë gjysmëfinal.
Peja ishte në epërsi ndaj Bashkimit për pjesën më të madhe të ndeshjes, me epërsi deri në 20 pikë në fundin e pjesës së parë, (42:22), por Bashkimi, që stinorin e rregullt e përfundoi në vendin e parë, e rriti ritmin e lojës. U afrua shumë në rezultat në çerekun e tretë e të katërt, para se të kalonte në epërsi. Epërsinë 77:76, Bashkimi e arriti me pikët e Valon Bunjakut, 2 minuta e 15 sekonda pa përfunduar i gjithë takimi.
Peja nuk u dorëzua dhe falë pikëve të Amin Hotit fillimisht ktheu epërsinë 78:77. Më pas Dardan Berisha realizoi katër pikë të tjera për 82:79.
Dy pikë nga gjuajtjet e lira i shënoi edhe Darryl Morsell, për 84:79, që ishte rezultati final i ndeshjes së dytë.
Rezultati i serisë gjysmëfinale tani është baras. Bashkimi fitoi me 20 pikë dallim 81:61 në ndeshjen e parë, para tifozëve të vet.
Takimi i radhës luhet të dielën në palestrën “Sezai Surroi” në Prizren.
Skuadra që shënon tri fitore avancon tutje në finale, ku do të takohet me fituesin e gjysmëfinales tjetër mes Trepçës dhe Sigal Prishtinës.
