U rikthye aty ku nisi gjithçka, por kësaj here përfundimisht.
Dardan Berisha, basketbollisti më i mirë kosovar do të jetë pjesë e Pejës deri në fund të karrierës, ani pse fillimi i këtij edicioni e gjeti pa skuadër.
36–vjeçari, nuk i fsheh emocionet që do të kthehet sërish në parket pas një kohe të gjatë, e sidomos te klubi i zemrës, në një intervistë për Tëvë 1.
Dardani po mendon dhe për sfidën më të madhe të një sportisti, pensionimin, ndonëse këtë datë nuk e di as ai vetë.
Ndër të tjera, ai shpjegon që arsyet familjare dhe lëndimet ishin ato që e detyruan të jetë jashtë vendit të tij të preferuar.
Berisha debutimin e tij do ta bëj të shtunën në palestrën Karagaqi, aty ku Peja e pret Bashkimin e pa mposhtur. Dardani po ashtu ka edhe një mesazh për fansat, ku thotë se së bashku me ta, mund ta befasojnë skuadrën nga Prizreni.
Berisha do ta bartë fanellën e Pejës për aq kohë sa do të jetë mirë fizikisht dhe sigurisht që synimet i ka të mëdha, ta rikthejë ekipin e vendlindjes aty ku e ka vendin, në majat e basketbollit kosovar.
