Nga 300 mijë dinarë, saktësisht me nga 2500 euro, Qeveria e Serbisë ka marrë vendim që t’i ndajë si asistencë financiare për serbët e arrestuar në Kosovë, të cilët dyshohen për krime lufte ndaj shqiptarëve në luftën e fundit në Kosovë.
Sipas njoftimit zyrtar që e ka bërë të ditur mediumi serb, asistenca financiare është për t’u ndihmuar të ndaluarve për procedurat ligjore, të cilat Serbia i konsideron “persekutim politik”.
Pretendohet se “ndihma është e dedikuar për ata, ndaj të cilëve janë duke u zhvilluar procese të inskenuara penale për krimet që pretendohet se janë kryer gjatë konflikteve të armatosura të viteve 1998-1999 kundër shqiptarëve në Kosovë, si dhe në procese tjera të inskenuara penale që janë iniciuar me qëllim të persekutimit politik”.
“Pagesa e kësaj ndihme të njëhershme do të realizohet në kohën më të shkurtër të mundshme”, thuhet në njoftim.
