Përfaqësuesi i protestuesve në Fshatin Soponicë të Kaçanikut, Ibrahim Dalloshi, ka thënë se banorët e këtij vendi do të bëjnë kujdestari për të mos e lejuar fillimin e punimeve për ndërtimin e hidrocentralit në këtë fshat, raporton teve1.info
Dalloshi i cili mori pjesë në protestën e banorëve të martën në këtë fshat, tha se arsyeja e kundërshtimit të hidrocentralit në këtë fshat është ndotja e ujit si dhe dokumentacionet jo në rregull me të cilat po tentohet të ndërtohet ky hidrocentral.
Ai në emisionin “Info-Nata” në Tëvë1, ka treguar për kundërshtimin e banorëve rreth këtij projekti.
“Jemi kundër për arsye se lumi është shumë i pastër në atë pjesë dhe nuk dëshirojmë të merr dikush dhe ta futë në gyp dhe mos të jetë asnjë pikë ujë për banorë. Duke zbuluar se kompania nuk i ka dokumentacionet në rregull, kemi tentu që mos ta futë atë ujë në gyp tash e tri vite, por javën e kaluar e pamë që erdh një eskavator për të punuar, pritëm nga Ministria e Mjedisit që ta ndalin, nuk erdhën, e bëmë një protestë të qetë, sot e pamë prapë një eskavator duke punuar. Në ato momente erdh një veturë e Policisë ai i filloi punimet dhe ne e ndërpremë, në ato momente filloi një përleshje e vogël e cila nuk donim të ndodh por meqë polici i dha urdhrin për punë ne u përleshëm me policinë. Ne do të jemi çdo ditë, do të kujdestarojmë deri të largohet eskavatori”, deklaroi Dalloshi.
