Luan Dalipi, shef i stafit të kryeministrit Albin Kurti, ka reaguar pasi shefi i BIA-s serbe Aleksandër Vulin, u vendos në listën e sanksioneve të ShBA-së.
Dalipi ka thënë se Vulin dhe presidenti serb Vuçiq, kanë pasur historikisht lidhje të ngushta.
“Presidenti i Serbisë Vuçiç dhe kreu prorus i agjencisë së sigurisë shtetërore të Serbisë, Aleksandar Vulin, tani në listën e zezë të Thesarit të SHBA-së, janë të dy anëtarë të së njëjtës parti politike dhe kanë pasur një rreshtim dhe bashkëpunim të ngushtë politik për dekada”, ka shkruar ai.
Dalipi ka shkruar se korrupsioni dhe krimi i organizuar janë të rrënjosura thellë dhe të promovuara nga radhët më të larta udhëheqëse të Serbisë.
“Serbia ka refuzuar t’i bashkohet sanksioneve ndërkombëtare kundër Rusisë”, ka përmendur ndër të tjerash Dalipi, transmeton teve1.info.
Ai ka thënë se Serbia josh dhunën nëpërmjet banditëve në veri të Kosovës dhe se Vuçiq tallet me dialogun duke garantuar të mos e nënshkruajë marrëveshjen.
“Megjithatë, Serbia mbetet një kandidat për t’u anëtarësuar në Bashkimin Evropian”, ka shkruar Dalipi, i cili ka shtuar se Kosova është fener i forcimit të demokracisë, luftimit të krimit dhe korrupsionit dhe ruajtjes së rendit kushtetues.