Ish-kryetarja e KQZ-së, Valdete Daka, ka thënë se pjesëmarrja e ulët e votuesve në zgjedhjet në komunat veriore, tregon se qytetarët nuk kanë qenë fare të interesuar se çka po ndodhë në ditën e sotme.
Daka theksoi se zgjedhjet në veri mund të mbahen por që sipas saj, vetëm duhet të ketë dakordim politik dhe vullnet politik.
E kjo sipas saj, u dëshmua sot me numrin e vogël të daljes së qytetarëve në vendvotime.
“Procesi ka qenë i rregullt ashtu siç është pritur sipas Ligjeve në fuqi, por pa pjesëmarrje të qytetarëve shumicë në këto katër komuna. Pjesa veriore është pjesë me interes të posaçëm dhe me situatë specifike që nga viti 99-të dhe gjithmonë ka pasë situata të cilat janë dashtë të zgjidhen më dialog dhe marrëveshje. Zgjedhjet mund të mbahen, por duhet të ketë vullnet dhe dakordim politik. Kjo është dëshmuar edhe sot, ku praktikisht në zgjedhje kemi një numër mu duk diku rreth dy mijë qytetarë në katër komuna, që tregon që ata qytetarë të tjerë fare nuk janë të interesuar se çka po ndodhë në ditën e sotme”, tha ajo.
Ndryshe Komisioni Qendror i Zgjedhjeve ka njoftuar se procesi zgjedhor në katër komunat në veri të vendit është zhvilluar pa ndonjë problem, teksa kryetari i KQZ-së, Kreshnik Radoniqi bëri të ditur se në këto zgjedhje kanë marrë pjesë 1.567 qytetarë apo 3.47 %./teve1.info./