Mesfushorit i Dritës, Albert Dabiqaj është shpallur futbollisti më i mirë i xhiros së 11-t të Superligës së Kosovës në futboll, që përfundoi të enjten.
Te premten, Federata e Futbollit të Kosovës, ka njoftuar se Dabiqaj e ka marrë çmimin “Ylli i Javës” që ndahet për lojtarin me paraqitjen më të mirë pas përfundimit të çdo xhiroje.
Komisioni i veteranëve të futbollit ka vlerësuar lart paraqitjen e Dabiqajt, të cilin e ka vlerësuar si lojtarin kryesor në fitoren e Dritës 3:0 kundër Prishtinës.
Krahas performancës së mirë ndaj Prishtinës, Dabiqaj kontribuoi edhe me dy gola në këtë fitore të rëndësishme të Dritës.
Pasi ka pranuar çmimin “Ylli i Javës”, Dabiqaj është shprehur tejet i lumtur kurse ka falënderuar bashkëlojtarët, stafin e trajnerëve si dhe komisionin për vlerësimin.
Mesfushori nuk ka hezituar të pranoj se synimi i Dritës këtë sezon është titulli i kampionit të Kosovës.
Aktualisht, Drita zë vendin e tretë në tabelë me 18 pikë, një më pak se Ballkani e Malisheva që ndajnë dy pozitat e para.
