Komuna e Prishtinës ka angazhuar në komision të vlerësimit të ofertave një person që nuk është pjesë e këtij institucioni.
Me këtë Komuna ka shkelur ligjin në kontratën 12 milionëshe për “Shërbimi i Arkitektit të Kryeqytetit”.
Kështu u tha në konferencën e organizuar nga Demokraci Plus.
Sipas tyre, anëtari i komisionit për vlerësimin e tenderëve, Kreshnik Ferizi, nuk ishte pjesë e komunës së Prishtinës, duke qenë se kontrata e tij me komunën kishte përfunduar më datë 31 dhjetor të vitit 2022.
“Rregullorja e Prokurimit Publik përcakton se autoritetet kontraktuese kanë të drejtë të angazhojnë ekspertë të jashtëm, në rastet kur kërkohet njohuri dhe ekspertizë e veçantë teknike dhe që ekspertët e tillë nuk janë në dispozicion brenda autoritetit kontraktues. Mirëpo, Kreshnik Ferizi, nuk ishte as i angazhuar as si ekspert i jashtëm në kohën kur mori pjesë në komisionin për vlerësimin e ofertave për këtë tender”, tha hulumtuesi në Demokraci+, Ardit Dragusha.
E përveç pjesëmarrjes, i njëjti person ka rezultuar të jetë bashkëpunëtor i kompanisë në fjalë, e që në këtë rast sipas Dragushës ekziston dyshimi edhe për konflikt të interesit.
“Përveç pjesëmarrjes së paligjshme në komision, ekziston dyshimi i bazuar për konflikt të interesit, duke qenë se grupi i operatorëve ekonomik ‘Shërbimi i Akitetktit të Kryeqytetit’, të cilët u shpallën fitues nga komisioni e ku anëtar ishte Kreshnik Ferizi, ofertuan me dokumentacion ku vetë Kreshnik Ferizi figuronte si bashkëpunëtor i Kompanisë ‘Anarch Sh.P.K’”, tha Dragusha.
Demokracy Plus i bënë thirrje Komunës së Prishtinës për anulimin e kësaj kontratë si dhe prokurorisë të ndërmarrë veprime për hetimin e këtij rasti.
Tëvë1 ka tentuar të marrë një qëndrim nga komuna, por që gjatë ditës ka qenë e pamundur.
