Raportuesja për Kosovën në Parlamentin Evropian, Viola Von Cramon ka reaguar pas bllokimit të autobusëve nga Serbia në kufirin me Kroacinë.
Cramon ka kërkuar që Serbia t’i lë udhëtarët të kalojnë duke theksuar se duhet të ndalojë së turpëruari veten.
Sipas saj, liria e lëvizjes për të gjithë duhet të sigurohet, pa diskriminim në baza kombësie.
“Serbia duhet të ndalojë së turpëruari veten dhe menjëherë t’i lërë kosovarët të kalojnë kufirin e Batrovcit, mbajtësit e ID/pasaportës! Duhet të sigurohet liria e lëvizjes së të gjithëve, pa diskriminim në bazë të kombësisë”, ka shkruar ajo.
Ndryshe, Fatmir Haxholli nga Zyra ndërlidhëse e Kosovës në Serbi ka njoftuar sot se, autoritetet kufitare të Serbisë, në pikëkalimin ‘Batrovci’, Serbi – Kroaci, nga mesnata po i mbajnë të bllokuar së paku katër autobus me targa dhe udhëtarë, qytetarë të Republikës së Kosovës.
Sipas Haxhollit, kjo po ndodhë në hakmarrje dhe nervozizëm ndaj votimit të Asamblesë Parlamentare të Këshillit të Evropës, për anëtarsimin e Kosovës në këtë institucion.
Derisa, Ministria e Punëve të Jashtme dhe Diasporës dhe Ministria e Punëve të Brendshme kanë thënë se pas situatës së krijuar në pikat kufitare në Serbi dhe ndaljes arbitrare të qytetarëve të Kosovës në vendkalime kufitare, të gjithë bashkatdhetarët dhe qytetarët që janë në lëvizje të evitojnë me çdo kusht kalimin nëpër Serbi.
Në reagimin e tyre thuhet se MPJD dhe MPB janë duke ndermarrë veprimet e nevojshme dhe do t’iu mbajnë të informuar rreth detajeve të reja.
Serbia should stop embarrassing itself and immediately let Kosovo 🇽🇰 ID/passport holders pass the Batrovci 🇷🇸 – 🇭🇷 border!
Freedom of movement of all must be ensured, with no discrimination based on nationality. https://t.co/Fd4CJei7Xn
— Viola von Cramon 🇺🇦🇪🇺🇮🇱 (@ViolavonCramon) April 17, 2024
