Sulmuesi i krahut, Kingsley Coman është larguar nga kampi i Francës pas kualifikimit të “Gjelave” në çerekfinale të Kampionatit Evropian.
Largimin e futbollistit të Bayernit Munchenit nga kampi e ka konfirmuar të martën edhe Federata e Futbollit të Francës.
Coman ka pasur pak hapësirë te Franca në Evropian, ku është aktivizuar për vetëm 15-të minuta prej 4 ndeshjeve në total sa i ka luajtur ekipi i trajnerit Dider Deschamps deri më tani.
Coman 28-vjeçar kishte një lëndim në fund të edicionit dhe nuk është në gjendjen më të mirë fizike. Ai ka luajtur vetëm në barazimin 0:0 ndaj Holandës në kuadër të fazës së grupeve.
Coman ka udhëtuar për në Suedi që të jetë afër gruas së tij pasi çifti është në pritje të fëmijës së katërt.
Nuk është bërë e ditur se kur lojtari i Bayernit do të kthehet sërish në kampin e Francës.