Eksperti i sigurisë, Fatmir Çollaku, tha se në vjeshtë duhet të mbahen patjetër zgjedhjet e reja në veri, derisa vlerësoi që serbët kësaj radhe do të marrin pjesë në zgjedhje.
Mirëpo sipas tij, që të ketë siguri në këtë proces zgjedhor, organizimi dhe monitorimi duhet të jenë demokratik.
“Në vjeshtë duhet të organizohen zgjedhje të reja në veri, pjesëmarrja e serbëve duhet të jetë e konsiderueshme. E kush do të zgjidhet kryetar, atë e përcaktojnë votat e qytetarëve. Fillimisht, organizimi dhe monitorimi i tyre duhet të jetë demokratik. Pjesëmarrja e popullatës shumicë pritet të jetë më e madhe. Serbët veç e kanë parë që ka mundësi të ndodhë edhe e kundërta. Unë shumë besoj që serbët do të marrin pjesë në zgjedhje”, deklaroi Çollaku në emisionin “InfoNata”.
Njëherit, eksperti i sigurisë theksoi që koordinimi me faktorët ndërkombëtar është i domosdoshëm, e sidomos në fushën e sigurisë.
“Bashkimi dhe koordinimi me faktorët ndërkombëtar është i domosdoshëm. Për tema të ndjeshme, sidomos të sigurisë, vendimet e mëdha nuk do duhej të merreshin “krye në vete”. Situata e brishtë imponon ende më shumë bashkëpunimin me ndërkombëtarët”, shtoi Çollaku në Tëvë1.