Nga një shkurti ka hyrë në fuqi ligji për unifikimin e çmimit të barnave.
Megjithatë, këtë vendim të Ministrisë së Shëndetësisë, qytetarët vështirë se po e besojnë.
Kjo pasi po hasin në çmime të ndryshme për barna të njëjta.
“Nuk munden me kon ato njëjta. Dikush e ka psh 20 euro, dikush 10, dikush 12 nëpër barnatore”, ka deklaruar një qytetar.
“Ka dallime, ka dallime. Po si s’është mirë, kishte me qenë n’rregull por nuk i besohet se është fushatë zgjedhore”, ka deklaruar qytetari tjetër.
“Moti është dashtë me u bo, moti…”.
Se është i domosdoshëm të zbatohet ky ligj e thonë njohësit e shëndetësisë.
“Në të kaluarën qytetarët e Kosovës kanë vuajtur shumë prej çmimeve të barnave, në shumë raste të fryra, për shkak të abuzimit nga institucionet apo operatorët e ndryshëm, prandaj është shumë i rëndësishëm që ky ligj të zbatohet”, ka deklaruar njohësi i shëndetësisë, Bujar Vitija.
Megjithatë sipas Odës së Farmacistëve, vënia në fuqi e këtij ligji nuk e ka prioritet rregullimin e sektorit farmaceutik.
“Vazhdimisht kemi ankesa nga farmacistët për implementimin dhe mungesën e informatave rreth këtij vendimi. Edhe një herë, paragrafi 6 i vendimit për unifikimin e çmimit të barnave është i jashtëligjshëm dhe i pazbatueshëm”, ka thënë Astrit Haxhijaha nga Oda e Farmacisteve të Kosovës.
Nga OFK megjithatë mirëpresin opinionin ligjor të ATK-së, me të cilin konfirmohet se çmimi i produktit duhet të jetë vlera e hapur e tregut por jo me pak se çmimi i kostos.
E për mënyrat e zbatimit të këtij ligji ka pasur reagime edhe nga Shoqata e Distributorëve të Produkteve Farmaceutike në Kosovës.
Sipas tyre, ligji i tillë mund të dëmtojë distributorët dhe të krijojë monopolizim të produkteve farmaceutike.
