Çmimi i naftës u rrit mbi 80 dollarë sot në tregun e Londrës, i nxitur nga shqetësimet për ndërprerjet në tregtinë globale dhe tensionet gjeopolitike në Lindjen e Mesme pas sulmeve ndaj anijeve në Detin e Kuq.
Një fuçi nafte në tregun e Londrës u rrit me 89 centë krahasuar me mbylljen e mëparshme, në 80.12 dollarë. Në tregun amerikan një fuçi u tregtua me një çmim më të lartë prej 93 centë, nga 74.87 dollarë.
Dje, çmimi në të dy tregjet u rrit me mbi një për qind pasi disa kompani devijojnë anijet dhe udhëtimet më të gjata rrisin kostot e transportit dhe sigurimit.
Sot, Greqia këshilloi anijet tregtare që lundrojnë nëpër Detin e Kuq dhe Gjirin e Adenit që të shmangin ujërat e Jemenit. Pronarët grekë të anijeve kontrollojnë rreth 20 për qind të anijeve tregtare në botë për sa i përket kapacitetit mbajtës. Ndërkohë, Uashingtoni nisi një grup pune për të mbrojtur tregtinë në rajon.
“Deri më tani, misioni detar i udhëhequr nga SHBA për të zbutur sulmet e Houthi-ve ka dështuar të zvogëlojë shqetësimet e përgjithshme për kalimin e sigurt përmes Detit të Kuq dhe transportuesit kryesorë të anijeve vazhdojnë ta shmangin atë ndërsa tensionet vazhdojnë,” tha Yeap Jun Rong nga grupi IG.
Houthi-t kanë njoftuar se do të vazhdojnë të sulmojnë anijet në Detin e Kuq në mbështetje të lëvizjes qeverisëse Hamas në enklavën palestineze të Gazës.
Rreth 12 për qind e trafikut të anijeve në botë zhvillohet përmes Detit të Kuq dhe Kanalit të Suezit. Furnizimi me naftë është i koordinuar, ende nuk ka mungesë, thonë analistët.
“Për sa kohë që prodhimi nuk kërcënohet, tregu përfundimisht do të përshtatet me ndryshimin e rrugëve të furnizimit,” tha Ole Hansen nga banka Saxo.
Organizata e Vendeve Eksportuese të Naftës (OPEC) raportoi veçmas se një fuçi e shportës së naftës të anëtarëve të saj u rrit me 72 centë në 79.19 dollarë të martën./kp
