“Mendoj sinqerisht se NATO duhet ta mirëpres Kosovën dhe kjo është ajo që them”, tha Clark për mediet në Kosovë, pas një takimi që kishte në Qeveri.
Por, në fakt vizita e tij në Kosovë dhe takimi me kryeministrin Albin Kurti nuk kishte temë çështjen e sigurisë.
Ish-gjenerali tani ka ardhur për çështje biznesi. Ai tha se diskutuan për energjinë solar dhe si ta sjellin sa më shpejtë atë në Kosovë.
“Diskutuam vetëm se sa shpejt mund të sjellim energjinë solare, e dimë se është koha që të gjitha vendet në juglindje të Evropës të largohen nga përdorimi i energjive që emetojnë karbon dhe ta zhvillojnë energjinë solare sa më shumë që është e mundur. Pra këtë çështje e diskutuam me kryeministrin, zëvendëskryeministrin dhe ministrin e energjisë”, tha Clark, përcjellë teve1.info
Ai tha se nuk kanë diskutuar aspekte tjera, përfshi edhe sigurinë, duke theksuar se kanë folur vetëm çështje të biznesit.
“Siguria më e mire që mund të keni, është një biznes i mirë”, tha Clark.
E kur u pyet për situatën e sigurisë dhe rritjen e tensioneve për shkak të veprimeve të Rusisë, tha se i takon Qeverisë së Kosovës të kujdeset për sigurinë, por kujtoi që në Kosovë është KFOR-i e NATO.
“Sa herë që tensionet rriten për shkak të veprimeve të Rusisë dhe efekteve që ka në këtë rajon, mendoj se i takon Qeverisë t’i kushtojë rëndësi sigurisë, por për atë e kemi edhe KLFOR-in e NATO-n në Kosovë. Sigurisht që edhe SHBA dhe ambasadori amerikan këtu, i cili është njeri shumë i mire, ka vëmendjen dhe kujdesin e nevojshëm”, tha ish-gjenerali.
Ish-gjenerali amerikan udhëhoqi fushatën e bombardimeve të NATO-s më 1999 që zgjati për 78 ditë dhe e cila kulmoi me çlirimin e Kosovës dhe largimin e trupave serbe.