Gjyqi i të akuzuarve për këtë sulm i erdhi fundit.
Në seancën e fundit ku u dhanë fjalët përfundimtare, disa fjalë i thanë edhe dy prej të akuzuarve.
Dejan Pantiq, mohoi pjesëmarrjen e tij në organizimin e sulmin ndaj ndërtesës së Komisionit Komunal Zgjedhor.
“Me të akuzuarit e tjerë asnjëherë nuk kemi qenë të shoqëruar, e asnjëherë nuk kemi pirë kafe së bashku, aq më pak të kemi kontakte përmes telefonit. Unë askënd nuk e kam lënduar, askënd nuk e kam sulmuar, me askënd nuk jam organizuar, por as nuk kam bashkëpunuR për të kryer ndonjë sulm”, ka thënë Pantiq.
E avokati i tij e kritikoi përmbajtjen e aktakuzës së prokurorisë, derisa tha se ka pasur presion në këtë çështje nga ana e ekzekutivit.
“Shumica e kanë paragjykuar dhe e kanë shpallur terrorist. Këtë e ka bërë në vazhdimësi ministri i punëve të brendshme. Kryeministri i Kosovës e ka akuzuar gjyqtarin e procedurës parapake dhe prokurorin të cilët kanë vendosur që arresti të ndryshohet në masë të arrestit shtëpiak. Aktakuza është shumë e dobët e paqartë, dhe e papranueshme. Është një prodhim i një hetuesie të dobët. Nuk ka asnjë provë qe Dejan Pantiq është i përfshirë në këtë sulm”, është shprehur Pantoviq
Fajësinë e mohoi edhe i akuzuari tjetër Aleksandër Vlajiq.
“Nga fillimi i kësaj procedure unë e flas vetëm të vërteën dhe asgjë tjetër. Nuk i kam kryer këto vepra penale qe përshkruhen në këtë lëndë. Nuk kam qenë i përfshirë në këto sulme të ndodhura në këtë datë. Nuk kam qenë pjesë e grupit dhe nuk kam ndihmuar në këtë grup. Këtë e kanë dëshmuar dëshmitar të shumtë. Nuk kërkoj asnjë privilegj, kërkoj drejtësi”, ka thënë Vlajiq.
Edhe mbrojtja e Vlajiq dhe ajo e Momir Vakiq, kritikuan prokurorinë se ka ngritur aktakuzë pa prova.
“Fajësinë e Aleskandër Vlajiq, prokuroria e bazon në tre prova materiale. Ato tre prova materiale janë biseda në viber të Vlajiq. Këtë aktakuzë e ka karakterizuar pamjaftueshmëria e konkretizimit të saj. Prokuroria Speciale e ngarkon të mbrojturin tim për bashkëkryerje pa asnjë provë. Në shkresat e lëndës ndodhen shumë prova, por 99% prej tyre janë të lëndëve tjera”, ka thënë Deleviq.
“Këtë person nuk e ka parë askush aty ku ka ndodhur ngjarja”, ka thënë Vasiq.
Në këtë aktakuzë ndodhet edhe Millun Milenkoviq, por që ai dhe mbrojtja e tij, bashkë me prokurorinë, i kanë dhënë fjalët e tyre përfundimtare një seancë më herët.
Aktgjykimi për këtë rast, do të shpallet të hënën.
