Janë nga komuna e Klinës.
Ata i lidhë më shumë përjetimet e luftës në fshatin Panorc të Malishevës.
Hysen Kryeziu e Ahmet Zenuni janë dëshmitarë në gjyqin për krime lufte ndaj Sërgjan Lazoviq.
Kryeziu tregoi se si shtatori i vitit 1998 i gjeti mes flakëve.
“Më dy shtator të gjitha fshatrat përreth, kanë qenë në flakë. Të tëra kanë qenë duke u djeg tërë natë, nga forcat ushtarake policore që nuk kemi mund t’i identifikojmë gjatë natës”, ka thënë Kryeziu.
Rradha më pas i kishte ardhur fshatit ku kishin gjetur strehë, Panorc.
“Kanë fillu granatimet, gjuajtjet përmbi popullatë më gjithëfarë lloje granatime. Kam parë të shtrirë, shumë gra, fëmijë e pleq”, është shprehur tutje Kryeziu.
Aty i kishin veçuar burrat nga gratë, duke i dërguar në shkollën e fshatit.
Rrugës, dëshmitari Ahmet Zenuni tregoi se si ishte goditur nga një polic serb.
“M’u ka afru ngat edhe mtha “A m’njofte?”, edhe m’ka m’shu shkelm nër bri. M’u ka terru krejt. Kom ra afër një shoku aty. S’kom pa afër 10-15 minuta”, ka thënë Zenuni.
Turma e burrave shqiptarë ishin dërguar për në shkollën e fshatit, ku ishte ushtruar dhunë.
“Na kanë dërgu në shkollën e Panorcit, m’kujtohet një thënie që s’e harroj kurrë, në gjuhën serbe na thanë “shikojeni hanën, se kurrë s’keni me pa me sy mo.” Secili që ka hy në shkollë, iu ka ekspozu dhunës fizike nga ata forcat policore që na shoqëronin. Secili ka hangër shkelma e grushta”, ka theksuar Kryeziu.
Qindra shqiptarë i kishin grumbulluar në këtë shkollë, e një pjesë të tyre, në mesin e të cilëve edhe Hysen Kryeziu ishin veçuar për t’u dërguar në burgun e Dubravës.
“Na kanë qit na kanë pshtetë për shkolle dhe na kanë urdhëru mu ulë edhe t’i vendosim duart pas koke. Dhe para nesh në ato moment është bërë një parakalim nga policia civile, jo ushtarake me pushka automatike në dorë”, ka përfunduar Kryeziu.
Sërgjan Lazoviq akuzohet se gjatë viteve 1998-99, në fshatin Panorc të Malishevës, bashkë me persona të tjerë të paidentifikuar, kishin kryer krime lufte, duke ushtruar dhunë fizike e psiqike ndaj popullatës civile dhe duke plaçkitur e djegur shtëpi.
