Një ditë më parë Gjykata Kushtetuese doli me një vendim ku i obligon të zgjedhurit e popullit që brenda 30 ditësh ta konstituojnë Kuvendin e Kosovës.
Pas këtij vendimi, kryeministri në detyrë, Albin Kurti, përmes një postimi ne Facebook i ftoi për takim liderët e partive politike për ta gjetur një zgjidhje për ngërçin institucional.
E para gazetaërve folën nënkryetari i VV-së, Glauk Konjufca dhe kandidatja për kryeparlamentare, Albulena Haxhiu.
Kjo e fundit sërish insistoi për votim fshehtë derisa u zotua se do tërhiqet do të tërhiqet nga kandidatura për kryeparlamentare nëse nuk i siguron 61 vota.
“Me rastin e votimit të fshehtë kur votojnë të gjithë deputetë, siç ka kërkuar edhe Gjykata Kushtuese, nëse unë si kandidate e propozuar nuk i marr së paku 61 vota tërhiqem nga kandidatura për kryetare e Kuvendit”, tha Haxhiu.
Nga Partia Demokratike e Kosovës, kanë njoftuar se do t’i shkojnë Kurtit në takim mirëpo kërkuan reflektim nga partia fituese e zgjedhjeve.
Sipas tyre vendimi për komisionin për votim të fshehur është anti-kushtetues.
“I bëjmë thirrje Vetëvendosjes që të reflektojë, është e qartë që gjatë kësaj periudhe është abuzuar me rregullat parlamentare nga kryesuesi i seancës duke na e imponuar në mënyrë jokushtetuse vendimin për komisionin për votim të fshehur”, tha Abelard Tahiri.
Pozitivisht i është përgjigjur ftesës edhe LDK, megjithëse nënkryetarja e kësaj partie Hykmete Bajrami u shpreh pesimiste se takimi i nesërm do të sjellë ndonjë rezultat.
Pjesëmarrjen në këtë takim e kanë konfirmuar AAK dhe NISMA Socialdemokrate.
Fatmir Limaj tha se ka ardhur koha për një marrëveshje politike mes palëve.
“Gjykata thotë uluni, bashkëbisedoni, tentoni të krijoni konsensus ose marrëveshje politike. Çështja ka mbetur këtu dhe këtu ka qenë edhe dje. Asnjë zgjidhje tjetër…(Pjesëmarrja në takim me Kurtin ) Sigurisht se po…Duhet marrëveshje politike ashtu si në çdo demokraci të qytetëruar. Në këtë drejtim Nisma është e hapur”, tha Limaj.
E Haradinaj pati disa kritika në drejtim të Kurtit.
Kurti do t’i pres krerët e partive politike të përfaqësuara në Kuvend të shtunën në orën 16:00.
