Për këtë hapësirë të rrethuar me mur, në kontest gjyqësor janë familja Mataj dhe Komuna e Pejës.
Që nga viti 2022, përmes një padie Muhamet Mataj, po kërkon pronësinë absolute për truallin në të cilin jeton për gjashtë dekada me radhë.
Sipas avokatit të familjes Mataj, kjo padi është e bazuar në fitimin me parashkrim të ligjit për pronësi dhe të drejtat sendore.
“Këtu në fakt kemi të bëjmë me ushtrimin e të drejtës së pronësisë duke besu që është e tija për gjashtëdhjetë vite me radhë. Dhe natyrisht, që ligji për pronësinë dhe të drejtat tjera sendore e parasheh si institutin e parashkrimit fitues, ku thuhet decidivisht që kushdo që ushtron të drejtën e pronësisë duke besu që është e tija, shpallet pronar”, deklaroi avokati i familjes, Yll Xhiha.
Ligji në të cilin thirret pala paditëse, parasheh kohën prej njëzet vitesh që një pronë të kalojë të pronësi të dikujt me mirëbesim.
Personi i cili me mirëbesim e ka njëzet (20) vjet në posedim të pandërprerë një paluajtshmëri ose një pjesë të saj, e fiton pronësinë në të.
Fatmire Mataj Vokshi, thotë se kjo është përmbushur pasi në këtë pronë, familja e saj jeton që nga vitet e 60-ta.
“Këtu kena ardhë qe gjashtëdhjetë vjet. Baba jem u ardhë, se e ka pasë shtëpinë atje te “Xhemal Kada”, e i kanë thanë “Sadik, duhesh me leshu atje për m’e ardhë këtu se bjen shkolla “Xhemal Kada”. Unë jam dëshmitare e gjallë, se jam lind e jam rrit qetu. Masnej, baba jem ka pagu me rata, plus asaj ka pagu, ka pagu se gjashtëdhjetë vjet nuk t’len komuna këtu pa pagu diçka”.
Bazuar në këtë, avokati Xhiha argumenton se pse prona duhet t’i njihet familjes Mataj.
“Paditësja kërkon që t’i njihet e drejta e pronës dhe komuna të largohet nga linçimi i tyre si uzurpatorë. Nuk mund t’i shpallë askush njerëzit uzurpatorë në mënyrë arbitrare. Këta kanë pasur dokumente pronësore, kanë pasë gjithashtu edhe faturat e shërbimit të cilat u kanë ardhur në emrat e tyre. Dhe domethënë është një bazë juridike e tyre që ta fitojnë të drejtën e pronësisë”, deklaroi avokati.
Sipas saj, komuna e Pejës po kërkon që t’ua marrë pronën që të ndërtojë banesa, ani pse ndërtimet e tilla janë kundërshtuar nga banorët e të gjithë lagjes.
“Kollaj me fukara, çka po don me bo, don me bo banesa, kur krejt mahalla thojnë s’dojmë banesa”, deklaroi banorja.
Për herë të parë pas tre vitesh që nga ushtrimi i padisë, këtë muaj janë zhvilluar dy seanca.
Në seancën e fundit të mbajtur më 6 nëntor, palët dolën në teren bashkë me ekspertin gjyqësor të gjeodezisë.
Në këto të dy seanca prezente nuk ishte përfaqësuesi i komunës, si palë e paditur.
Në lidhje me këtë proces gjyqësor dhe pretendimet e familjes Mataj, televizioni ka tentuar të marrë një qëndrim nga Komuna e Pejës, mirëpo të njëjtit nuk kanë dhënë përgjigje.
