Për 25 vite komuna e Fushë Kosovës u udhëhoq nga Burim Berisha.
E pas më shumë se dy dekadave, Berisha i cili vjen nga radhët e Lidhjes Demokratike të Kosovës u tërhoq nga gara për kryetar të këtij qytet.
Ulësen e kryetarit të Fushë Kosovës nga e njëjta parti këto zgjedhje po e synon Besnik Osmani.
Përveç Besnik Osmanit të LDK-së, për Fushë Kosovën po garojnë edhe katër kandidatë të tjerë: Rrahim Tërnava i PDK-së, Vildane Latifi nga AAK, Valon Prebreza nga LVV dhe Hasan Ismajli që po garon i pavarur.
Investimet në infrastrukturë, zhvillim ekonomik, në arsim, shëndetësi janë prioritet për secilin nga këta kandidat gjatë prezantimit të programit të tyre qeverisë në dy javë e para të fushatës zgjedhore.
Por këtyre premtimeve nuk është që po ju besojnë edhe shumë qytetarët.
“Para zgjedhjeve ja nisin anej kundje, pas zgjedhjeve e njëjta muzikë. Papastërtia, ndërtesa palidhje”, tha qytetari Ferat Jashari.
Problemet me mbeturina, rrugë, parkingje janë ato të cilat e sfidojnë çdo ditë Banush Gashin i cili që 20 vite jeton në Fushë Kosovë.
“Unë jam banor këtu prej 2000, mas së shumti që me kon problem është bërlloku, shumë pa pastërti është, pastaj nuk ka parqe i kanë mbush banesa një mbi një as nuk kanë lënë parkingje. Të mytë bërlloku, çerdhe për fëmijë nuk ka vetëm në privat nuk mundet me pagu për një fëmijë gjysën e rrogës”, tha ai.
Problemet e njëjta kanë edhe qytetarët e tjerë që jetojnë në Fushë Kosovë.
“Qito parkingje e qito zhurma me do kotorra shpirtin na kan pru… e me ndryshu munden edhe pse pak ja kanë nis por pak me vonesë dihet kjo për shkak të zgjedhjeve e këto parkingje .. me ec trotuarve me kulica…”, tha Islam Dervishi.
“Bërlloku, rryma që herë ka herë nuk ka, rrugët nuk janë shtruar, parqe nuk po kemi në Fushë Kosovë kërkund hiq, janë shumë sene që duhet me u krye. Pastaj duhet me u hap një çerdhe pasi publike e kemi vetëm një kurse këto private po janë shtrenjtë”, tha qytetari Salih Haradini.
Statistika e fundit të popullsisë kanë treguar se numri i banorëve rezidentë të Fushë-Kosovës ka shënuar rritje prej afro 30 mijë banorësh, duke arritur në rreth 60.000 prej 34.827 sa kanë qenë në vitin 2011.
