Është programi legjislativ i Qeverisë Kurti III për periudhën 2026-2028.
Për këto tre vite, janë paraparë 175 nisma ligjore, ku secila prej tyre e ka afatin e caktuar kohor për miratim.
Pjesa më e madhe e projektligjeve dhe plotësim ndryshimeve, janë vendosur në vitin 2026.
“Praktika e së kaluarës na ka treguar se pavarësisht vëllimit të madh të projektligjeve të planifikuara në agjendën legjislative të Qeverisë, nuk është se ato kanë arritur të përfundohen, të paktën në kuadër të planit e afatit që janë të përcaktuara në agjendën legjislative”, thotë Vullnet Bugaqku nga KDI.
Prej 150 sa janë në total gjatë këtij viti, 6 prej tyre veçse janë miratuar në mbledhjet e mbajtura të Qeverisë.
42 të tjera janë planifikuar të miratohen deri në muajin qershor, kurse pjesa dërrmuese e këtyre nismave, gjithsej 102 janë lënë për miratim në pjesën e dytë të vitit.
Ndërkaq, për vitin 2027 janë planifikuar 24 nisma ligjore, kurse për vitin 2028 vetëm një nismë ligjore.
Më së shumti projektligje në agjendën legjislative tre vjeçare ka Ministria e Financave me 29 sosh, kurse Ministria e zhvillimit rajonal dhe Ministria për komunitete dhe kthim, nuk kanë asnjë projektligj të planifikuar.
“Programi është mjaft ambicioz, kjo është për faktin se kanë mbetë shumë iniciativa nga vitet e mëhershme, por edhe për faktin se në vitin 2025 e kemi pasë një ngërç politik. Gjithashtu, si propozim mund të konsiderohet se disa projektligje, disa nisma të kalohen si pako, siç e kemi rastin me Projektkodin civil dhe projektkodin e procedurës civile. Pra, nisma që janë drejtpërdrejt të lidhura njëra me tjetrën”, shprehet Blerina Istrefi nga GLPS.
Larg agjendës nuk janë lënë edhe disa nga nismat ligjore më të diskutuara gjatë mandatit të kaluar.
Si Kodi Civil, Projektligji për Shëndet Riprodhues dhe Fertilizim të Asistuar Mjekësor, Projektligji për Sigurimin e Detyrueshëm të Kujdesit Shëndetësor, Projektligji për Bankën Zhvillimore, Projektligji për KPK e KGJK, Projektligji për Pagat në Sektorin Publik.
