Afati për presidentin po afron.
Brenda 18 ditësh, vendi duhet të bëhet me president të ri, në të kundërtën, shkohet në zgjedhje të jashtëzakonshme.
E në rast se kjo ndodh, pozitën e presidentes do të vazhdojë ta mbajë Albulena Haxhiu, si ushtruese e detyrës.
Por këtë pozitë, e kryetarja e Kuvendit nuk mund ta mbajë më shumë se 6 muaj.
Andaj në rast se as kaq kohë nuk mjafton për ta zgjedhur presidentin, vendi hyn në një territor të pashkelur më parë.
“Pas muajit të gjashtë nuk ka ndonjë dispozitë kushtetuese se si mund të rregullohet kjo. Nuk ka një situatë që mund të lexohet ose që mund të themi që e merr u.d të presidentit dikush tjetër”, deklaroi hulumtuesi në IKD, Naim Jakaj.
Por ani se Kushtetuta nuk parasheh zgjidhje, sipas ish-kryetarit të Apelit Hasan Shala, presidenca s’mund të mbetet pa zot shtëpie.
“Nëse kalon afati prej 6 muaj edhe nuk zgjedhet presidenti, Kushtetuta nuk ka përcaktuar ndonjë veprim tjetër, mirëpo duke marrë parasysh këtë praktikë që ka ndodh edhe në Evropë, detyrën e presidentit duhet ta marrë kryetari i Gjykatës Kushtetuese deri të zgjedhet presidenti i ri”, tha ish-kryetari i Gjykatës së Apelit, Hasan Shala.
Në vazhdën e përpjekjeve për ta gjetur një zgjidhje, kryeministri Albin Kurti ka takuar deri tani vetëm liderin e Lidhjes Demokratike Lumir Abdixhiku, por që takimi rezultoi pa marrëveshje konkrete.
