Para orës tetë e tridhjetë erdhi në Kuvendin e Kosovës.
Këtu, në cilësinë e kryetarit të Vetëvendosjes, Albin Kurti e priti në takim të parin e Partisë Demokratike të Kosovës, Memli Krasniqin.
Në sallën 204, u ulën përballë njëri tjetrit.
Mirëpo, derisa gazetarët morën pamje nuk shkëmbyen as fjalë e as shikime.
Takimi zgjati më shumë se një orë, e detaje nga ai dha vetëm Krasniqi.
Ai tha se nuk ka marrëveshje PDK-VV.
“Ne nuk kemi pasur qëndrim mohues apo bllokues. Nuk na takon neve t’ia zgjedhim kandidatin për kryetar të Kuvendit partisë së parë. S’kemi marrëveshje politike”, u shpreh Krasniqi.
Sipas Krasniqit, kërkesë e PDK-së ka qenë të ndërrohet emri i kandidatit.
“Atë që e kam thënë pas çdo dështimi të seancës, ia kam thënë z. Kurti përsëri. Për PDK-në është me rëndësi të zhbllokohet kjo situatë, të konstituohet Kuvendi, të mendohet një kandidat tjetër”, tha kryetari i PDK-së.
Në këtë takim, i ftuar ishte edhe i pari i Lidhjes Demokratike të Kosovës, Lumir Abdixhiku.
Por ky i fundit për të dytën herë e refuzoi thirrjen e Kurtit.
E për këtë dha një sqarim në rrjetin social Facebook.
“Sepse nuk njohin njerëzoren, as fjalën as kurrizin! Kjo politikë duhet të marrë fund! LDK do t’i japë fund! Është interes kombëtar refuzimi i qasjes së tillë politike, jo nënshtrimi e dorëzimi para saj. Shpresoj dhe partitë tjera ta kuptojnë këtë gjë sa më pare”, ka shkruar ai.
Për takimin sy më sy me Krasniqin nuk foli kryetari i Vetëvendosjes, Albin Kurti.
