Sulmi terrorist në Banjskë të Zveçanit, ishte dëgjuar edhe në ish hotelin Ranjska Banjska.
Madje, atje kishte pasur edhe lëvizje të grupit terrorist.
Për atë se çfarë ka ndodhur aty natën e 24 shtatorit 2023, para trupit gjykues rrëfeu një punonjës i hotelit.
“Kam dalë rreth 50 herë jashtë, është dëgjuar zhurmë e madhe. Kam dëgjuar gjuajtje me armë. Të gjithë banuesit në hotel, ata të gjithë kanë zbritur poshtë tek unë. E unë është dashur të kujdesem për ta, pasi afroheshin tek dritaret, unë u thosha të largoheshin tek dritaret pasi mund t’i gjuajë dikush:, tha Rade Nedelkoviq rojtar i hotelit.
Dëshmitari tha se pas kësaj, tek hoteli kishin ardhur disa persona të armatosur, që e kishin sjellë aty një të plagosur.
“Unë kam qenë i detyruar t’i lëshoj se kanë qenë të armatosur, nuk kam guxuar të refuzoj. Pra, dy kanë mbetur e dy janë larguar, domethënë i plagosuri dhe një tjetër kanë mbetur. Më pas, prej hotelit deri te manastiri, kanë shkuar në këmbë. Nuk e di se kush janë ata, sepse kanë pasur maska”, u shpreh ai.
Ai pohoi se më parë në hotel kishte qëndruar edhe Milan Radoiciq.
“Vetëm kam dëgjuar, kurrë nuk e kam pa. Ka qenë një herë në hotel sepse edhe nëse vinte, vinte pak si më ndryshe”, tha Nedelkoviq.
Në gjyqin ndaj Blagoje Spasojeviq, Vladimir Toliq dhe Dushan Maksimoviq, të akuzuar për sulmin terrorist në Banjskë, dëshmoi edhe një hetues policor.
Halim Behramaj, tregoi se nga e kuptuan se grupi sulmues ishte i mirëorganizuar.
“Në bazë të armëve të përdorura që nga zhurma kemi kuptu qe janë të kalibrave të ndryshëm, janë përdorur armë të rënda, pozitat nga kanë gjuajtur dhe errësira në fshat, na ka bërë të kuptojmë se ka qenë grup shumë mirë i organizum”, tha Behramaj
Gjykimi në rastin “Banjska”, do të vazhdoj të premten.
