Nënkryetarja e Partisë Demokratike të Kosovës, Vlora Çitaku ka kritikuar kryeministrin në detyrë, Albin Kurti i cili takimet me përfaqësues të partive politike nga komuniteti joserb, i ka mbajtur në zyrën e kryeministrit.
Ajo ka thënë se Kurti zyrën e shtetit po e shndërron në zyrë të partisë.
Çitaku duke e akuzuar Kurtin për shkelje të ligjit e traditës ka thënë se ai do të ketë një përfundim politik të turpshëm.
“Albin, Kosova nuk është parti. Kosova nuk është pronë. Ti nuk je mbi ligjin. Nuk je mbi Kushtetutën. Nuk je mbi dinjitetin e këtij populli që ka vuajtur për demokraci, jo për t’u shndërruar në spektatorë të një partie që kërkon të kontrollojë gjithçka. Po i shkel ligjet. Po i përbuz traditat. Po i përdhos parimet që dikur i mbroje me pasion. Albin, me këtë qasje, fundi yt politik nuk do të jetë vetëm një dështim, do të jetë i turpshëm. Historia nuk fal. Populli nuk harron”, ka shkruar Çitaku në Facebook.
Kryeministri në detyrë, Albin Kurti të mërkurën dhe të enjten ka takuar liderët politikë të pakicave joserbe për të disktuar për formimin e qeverisë së re.
