Nënkryetarja e Partisë Demokratike të Kosovës, Vlora Çitaku e ka cilësuar manipulim deklaratën e kryeministrit Albin Kurti, i cili ka thënë se për herë të parë ekonomia e vendit e kalon shifrën e mbi 400 mijë të punësuarve, e arritur kjo për të cilën meritat ia ka dhënë qeverisë së drejtuar nga ai.
Çitaku ka thënë se Kurti ka punësuar njerëz vetëm në Gjermani, duke aluduar në migrimin e kosovarëve në Gjermani dhe vendet tjera evropiane.
“Është tashmë e ditur se populistët dhe manipulatorët e marrin një të vërtetë, dhe atë e përziejnë me dhjetë gënjeshtra. E tillë ishte edhe deklarata e Kurtit për 400.000 të punësuar nga ai. Kryeministër, ju keni punësuar njerëz vetëm në Gjermani. Mos më besoni mua. Besoni në të dhënat e Entit të Statistikave”, ka shkruar Çitaku në “Facebook”.
Kryeministri Albin Kurti dhe ministri i Financave, Hekuran Murati kanë se në bazë të statistikave të Administratës Tatimore të Kosovës, ekonomia e vendit për herë të parë ka tejkaluar shifrën prej 400 mijë vendeve aktive të punës. Madje, sipas Kurtit e Muratit kjo është dëshmia më e mirë që politikat e punësimit të qeverisë aktuale po funksionojnë.
