Autoritetet në Kosovë në vazhdimësi kanë prezantuar prova përmes së cilave thonë se grupi terrorist ka lidhje me Beogradin zyrtarë, ekspertët e marrëdhënieve ndërkombëtare thonë se nëse kjo konfirmohet, atëherë kemi të bëjmë me agresion të Serbisë mbi Kosovën.
Sulmit që bëri grupi terrorist ndaj Policisë së Kosovës më 24 shtator, në vend po i referohen si sulm terrorist.
Por, nuk kanë munguar edhe zërat që këtë veprim e quajnë si agresion të Serbisë mbi shtetin e Kosovës. Kjo për faktin se janë prezantuar prova që tregojnë se grupi kishte mbështetje nga autoritetet serbe.
Profesori i Marrëdhënieve Ndërkombëtare në Universitetin Mesdhetar të Shqipërisë, Dritan Hoti, thotë se konfirmimi i lidhjeve të grupit terrorist ne Beogradin, në aspektin ndërkombëtar do të konsiderohet edhe si agresion i Serbisë mbi Kosovën.
“Stimulimi, inkurajimi i një aktiviteti me përmbajtje diversioni të një shteti ose forcave të caktuara të përgatitur nga një shtet në territorin e një shteti tjetër me qëllim ndryshimin e një realiteti politik, socio-politik përbën një agresion të mirëfilltë … Nëse këto provohen katërçipërisht, d.m.th bashkëpunimi i grupit paraushtarak, trajnimi dhe armatosja e tyre me forcat e sigurisë së Serbisë dhe të ushtrisë serbe kemi të bëjmë me një agresion të mirëfilltë të mbështetur në interpretimin e nenit 39 të Kartës së Kombeve të Bashkuara”, tha profesori i Marrëdhënieve Ndërkombëtare, Dritan Hoti.
Ndërsa, eksperti i sigurisë Fadil Kajtazi, thotë se sulmi i 24 shtatorit kishte për qëllim aneksimin e veriut, dhe si i tillë mund të cilësohet agresion.
“Fakti që është lidhja e këtij grupi diversant me shtetin e Serbisë është agresion i pastër për arsye se kjo mund të konsiderohet edhe si një pararojë e një agresioni pastaj më të madh. Mund të cilësohet si një njësit i cili i hap rrugën njësive që vijnë mbrapa … Vuçiq tenton që përmes krijimit të kaosit në Kosovë të fitoi politikisht dhe të aneksoi pjesën veriore të Kosovës. Nuk ka se si të quhet ndryshe”, u shpreh njohësi i çështjeve të sigurisë, Fadil Kajtazi.
Rezoluta 3314 e Kombeve të Bashkuara, agresion quan edhe dërgimi nga ose në emër të një shteti të bandave të armatosura, grupeve të parregullt ose mercenarëve, të cilët kryejnë akte të forcës së armatosur kundër një shteti tjetër.
