Dita ku do të merret vendimi për shtrenjtimin e energjisë elektrike prej 15% po afrohet.
Por këtë akt po e kundërshtojnë kategorikisht shumë qytetarë, figura politike e disa institucione.
E pjese e këtyre zërave ishte edhe Zyra e Presidencës së Kosovës.
Ata madje dërguan komente në Zyrën e Rregullatorit për Energji Elektrike.
Njëri prej propozimeve të presidencës është subvencionimi i energjisë.
Ky opsion u përmend të hënën edhe nga ZRRE.
Një propozim për ZRRE-në pati të martën ministrja në detyrë e Ekonomisë, Artane Rizvanolli.
E propozime për këtë çështje ka edhe eksperti i ekonomisë Adem Qorolli.
“Janë dy vendime që mund ti marrin qysh nga sot, ta heqin taksën dhe ti rrisin tatimet e pjesës përfituese apo kompanisë turke, kështu i kanë dy mundësi cilën do që e zgjedhin qytetari shpëton. Jo ti rrisin tatimet, jo ti rrisin shpenzimet institucionale, jo të rrisin energjinë elektrike, qytetari është në gjendjen më të mjerueshme, bizneset janë në gjendjen më të mjerueshme ky vend nuk është më për jetesë”, thotë ai.
E për gjithë këtë rritje ai e hedh fajin diku.
“Nuk kemi një burrë shtetas që i thotë kompanisë turke ule fitimin, sepse nuk mundem me i rrit shpenzimet për qytetarin dhe nuk mundem të i rris shpenzimet për shportën e konsumit. Kështu që nuk mundet të i thonë kompanisë turke që po ta rrisim çmimin për thëngjill pastaj ti rrite fitimin dhe shihe a po ki mundësi të bërit tregti, sepse një kompani të del me fitim me mbi 40 milionë dhe qytetarët të ikin nga migrimi sepse nuk mund të ia dalin me kostot e jetesës duke e rritur gjithmonë për 115% gati e treta herë me rritje energjetike dhe ministra të fillon me oferta po kjo është qeveri e ofertave të fundvitit, qeveri e ofertave sociale por jo edhe e politika të mirëfillta institucionale”, deklaron Qorrolli.
Kundër rritjes së çmimit të energjisë elektrike janë edhe nga shoqata “Konsumatori”.
“E japim thëngjillin dhe na kompensojnë me energji elektrike dhe kjo mundësi është e menjëhershme dhe kjo mundësi jo që krijon kushte për ngritje të çmimit, por krijon kushte për uljen e çmimit të energjisë elektrike dhe për zgjedhje afatgjatë për pesë vite dhjetë vite aq sa kemi thëngjill”, tha Selatin Kaçaniku.
Televizioni ka tentuar të marrë një qëndrim nga qeveria se a ka në plan të subvencionoje energjinë elektrike, por nuk ka marrë përgjigje gjatë ditës.
Me datën 11 prill pritet që të merret vendimi për shtrenjtimin e energjisë elektrike prej 15%, të njëjtën ditë do të protestohet kundër rritjes së çmimit të rrymës.
